561/2023-2024

Aizawl, 24th May 2023: Vawiin khan DGP Conference Hall, Police Headquarters, Aizawl-ah State Level Anti-Narcotics Task Force (ANTF) meeting neih a ni a. He hunah hian Convener Pu Ngurchungnunga Sailo, Excise & Narcotics Commissioner-in member kal te inlawmna thu a sawi a. State Level ANTF chairman Pu Veenu Bansal, IGP (Intelligence) chuan thu sawiin, he ANTF hi Narcotics Coordination Centre (NCORD) Secretariat a nih thu te, ruihhlo dona atana agency hrang hrangte telna pawl a nih angin tha thlah lova ruihhlo an do zel thu te a sawi a. Meeting hmasa thurelte bawhzui a nih dan thlirhona hun neih a ni bawk.

State Level ANTF meeting-ah hian ruihhlo do nan Nasha Mukt Bharat Abhiyan (NMBA) hnuaia ‘drugs awareness campaign’ kalpui mek chu chhunzawm zel ni se tiin an rel a. Excise & Narcotics Department-in ruihhlo chungchanga mitin biak pawh theih tura an siam - Narcotics Call Centre, Excise & Narcotics Department website-a tarlan chu tangkai zawka mipui ten an hman an duh thu pawh sawi lan a ni a. Ruihhlo man tur kawhhmuhtu ‘informer’ leh a mantu officer tana Sorkar laipui hnuai Narcotics Control Bureau atanga lawmman (reward) hmuh theih a nih thu te, ND&PS Act hnuaia case 4 laiah reward hi hmuh tawh a nih thu leh reward hi la dil zel tur a nih thu pawh he hunah hian tarlan a ni a. School zirlaibuah ruihhlo dona lam inzirtirna telh an duh thu meeting-a tel te hian an sawi lang bawk.

Mizoram sawrkar hnuaia ‘Core Committee on Ruihhlo Do’ atanga ANTF-in ruihhlo dona atana an sum hmuh hman dan tur thlirhona hun neih a ni a, an dawn chhan ang ngeia dik taka hman tha an tih thu kalkhawmte hian an sawi a ni.

Vawiin meeting-ah hian DIG (CID) Pu Lalhuliana Fanai, DIG (NR) Pu Lallianmawia, Aizawl SP Pu Rex Zarzoliana, Police leh Excise & Narcotics officer-te bakah BSF, FSL leh Drugs Controller aiawhte an tel a, district hrang hrang SP ten online-in an chhim bawk a ni.