562/2023-2024

Champhai, 24th May, 2023: Vawiin chawhnu dar 2:30 khan District Level Committee on Green Mizoram, Champhai District chu an Chairman Pu James Lalrinchhana, District Bawrhsap hovin DC Conference Hall-ah an thukhawm a, kumin June ni 10 a Green Mizoram Day (GMD) 2023 hman dan tur chungchang an rel. Kumin Green Mizoram Day thupui thlan chu, 'Thing phun ila, enkawl zui ang u' tih a ni.

Bawrhsap Pu James Lalrinchhana chuan nikum lamah hlawhtling taka Green Mizoram Day hman a nih thu leh, hemi denchhenin thing tiak sang chuang phun a nih thu a sawi a. Thing leh mau, nungcha leh thil nung chi tinrengte chu inmamawh tawn vek kan nih thu sawiin, tui hna siamtu leh sik leh sa thlak danglam theitu thingte chu kan phun belh sauh sauh a tul hle a ni, a ti a. Kalkhawmte chu hlawhtling taka Green Mizoram Day hman a nih theih nan mahni mawhphurhnate tha taka hlen theuh turin a chah a ni.

Member Secretary Pu Lalduhthlana, DFO, Champhai Forest Division tarlan danin nikum Green Mizoram Day denchhen khan hmun thlan bik 3 ah thing tiak 1432 phun niin, mi 720 an hnatlang a. Heng bakah hian Champhai Forest Division hnuaia Range hrang hrang 4 kaltlanga thingtiak phun bakah mimal leh pawl hnena pekchhuah thing tiak 13951 a awm bawk.

Thukhawm chuan kumin Green Mizoram Day hawnna hun chu June ni 9, chawhma dar 11:00 ah Nagar Van -Urban Forest Area Champhai Zoteah Khuallian District Bawrhsap Pu James Lalrinchhana hova hman nise a ti a. Program neih dan turte ngaihtuahho niin, program kimchang chu DFO kutah dah a ni a. Green Mizoram Day (GMD) hawnna inkhawmah hian Champhai District chhunga khua, kangmei ven kawnga hma la tha 3 te, nitin Chanchinbu chhuak kangmei ven chungchanga mipui zirtirna pe tha 3 te leh thingphunte enkawlzui kawnga mawhphur tura ruat Plot Ambassador tithate hnenah lawmman pek pek ni se tih a ni bawk a. Thingphun hnatlang neih chhunzawm nghal tur niin, Tlaizawng, Vaube leh remchang dangte Nagar Van Area Champhai Zoteah phun tur a ni ang.

He hunah hian nikum lama thingphun enkawl zui dante ngaihthlak niin, thingphun mai duh tawk lova enkawlzui a pawimawh thute tarlan a ni a. Plot Ambassador siama vilzui zel ni se tih a ni a. Green Mizoram Award chungchang pawh sawiho niin, Champhai District atanga mimal, pawl leh Sawrkar Department hetiang lawmman dil tlakte'n an dil theihna tura hmalakpui dan turte pawh ngaihtuahho a ni. Remna Ni puala thingphun hnatlang neihna hmun atan NH 06 kawngpui kam chu thlan a ni bawk.

Green Mizoram Day programme hi Mizoram Sawrkar hmalaknain kum 1999 atanga tan a ni a, hemi hnu hian urhsun takin District hrang hrangah Sawrkar leh NGO tangkawpin a huaihawt chhunzawm thin a, kum 2017 atang khan June ni 11 hi Green Mizoram Day atana ruat a ni a, kumin bikah chuan June ni 11 hi Pathianni a nih avangin June ni 9, Zirtawpniah Green Mizoram Day hman a ni ang.