No.520/2021-2022 

Hnahthial the 14^th May, 2021 - Health & Family Welfare Minister Dr.R.Lalthangliana hmalaknain District thar pathum -Hnahthial, Khawzawl leh Saitual damdawi In tih changtlunna tura Covid-19 Vaccine dah thatna tur Deep Freezer pakhat leh Ice Lined Refrigerator (ILR) pahnih te chu nimin khan Hnahthial Damdawi In thlenpui a ni.

Hemi pual hian District Hospital Hnahthial, Main building-ah inkhawm tawi neih niin Dr.Lalrengpuii Ralte, Medical Officer in a kaihruai a, tun dinhmunah Hnahthial District-ah Covid-19 positive case a awm rihlo thu leh fimkhurna erawh neih reng a tul thu sawiin damdawi In kal tur damlo te pawh uluk taka an endik thin thu a swi a ni.

Hnahthial District Bawrhsap Pu H.Dolianbuaia chuan tun ang hun harsa leh khirhkhanah District Hospital Hnahthial-in Khawl tha leh man to tak tak pathum a nei thar chu lawmawm a tih thu sawiin "Sorkar laipui pawh Covid-19 hrileng vang hian an buai em em a, tharchhuah leh thawhchhuah neilo keini ang State tan phei chuan a buai thlak takzet a. Chutiang kara hmasawnna hmel thar hmuh hi a lawmawm hle a ni" tiin bialtu MLA leh Health Minister ni bawk Dr.R.Lalthangliana hmalakna leh thawhrimna fakawm a tih thu a sawi a ni.

He hunah hian Health Minister Dr.R.Lalthangliana'n Hnahthial District chhunga VLTF 31 ten tul leh mamawha an hman tur Rs.5000/- theuh a vaiin Rs,1,55,000/- a rawn thawn chu Pu J.Lalchhuana, President South Tuipui Block-I MNF chuan VLTF te hnenah ah a hlan a ni.

Hnahthial Town VC Association President, Pu HC.Rohmingthanga chuan lawmthu sawiin "mi harsa leh rethei tak tak, chhuanchham mai thei engemawzat kan awm laiin bialtu MLA Dr.R. Lalthangliana’n District chhung zawng zawng VLTF te hnena tanpuina sum min pe hi a lawmawmin kan District mipuite tan hian kan bialtu MLA hi a thlamuanpui awm hle a ni" tiin Covid-19 do kawnga District Bawrhsap leh Sorkar pisa hrang hrang hotute inpekna leh thawhrimna lawmthu a sawi a ni. Prominent Citizen Pu Vanlalhnema pawhin thu sawiin "ramin hun harsa tawk mahse hruaitu ten theihtawp chhuahin hma an la zel a, indem hman kan ni lo tih hriain lungrual takin Covid-19 hri do hna hi i kalpui zel ang u" tiin kalkhawmte a fuih bawk a ni.