240/2026-2027

Dated Hnahthial, the 22nd April, 2026: Vawiin chawhnu dar 03:00 khan DC Meeting Hall, Hnahthial-ah Hnahthial District Bawrhsap Pi K. Vanlalruati kaihruaiin District Level Committee on Gyan Bharatam Mission an thukhawm a. He hunah hian Hnahthial District chhunga Gyan Bharatam Mission chungchang inhrilhfiahna hun leh hemi hnuaia hmalak tur hrang hrang sawi ho a ni.

Art & Culture Department-a Chemist, Pu C. Lalmuanpuia chuan Gyan Bharatam Mission chungchang sawifiahin Gyan Bharatam Mission chu Ministry of Culture hnuaia Central Scheme niin India ram puma kutziak hlu bik (Manuscript) zawnchhuah hna beihpui thlakna a nih thu a sawi a. Heng kutziakte hi pi leh pute kut hnu hlu tak tak a nih thu leh tunlai thiamna hmanga heng an sulhnute vawnhim beihpui thlak a nih tur thu kum 2025 Independence Day thuchahah Prime Minister pawhin a lo puan tawh thu a sawi bawk. 

April 1, 2026 khan he Gyan Bharatam Mission atan hian Mizoramah State Level Committee leh District Level Committee lo din tawh niin chak zawk leh awmze nei zawka hmalak dan turte chu State Level Committee ṭhukhawm hian an lo rel tawh a ni.

Pi leh pute sulhnu, an kutziak (Manuscript) hrang hrangte hi an riral mai loh a, vawnthat an nih theihna tura hmalakna kawng hmasa ber chu a zawnchhuah hna thawh niin khawi hmunah nge, tu hnenah nge, Manuscript engzat nge an kawl tihte chu Gyan Bharatam Mobile Application hmangin mitinin an report thei a. Heng Manuscript-te hi inchhuhsak tur a nih lo va, a neitute remtihna thlapin uluk taka thla lak a, a Soft Copy chauh vawnhim tura lak tur niin a tak (Original) erawh a neitute kutah a awm zui ang.

He hunah hian Pu HD. Lalpekmawia, Project Director, DRDO; Govt. Hnahthial College-a Mizo Professor te, Hnahthial District VC Association President, Pu Lallawmzuala, Chairman Cultural Sub Committee, Sub Hqrs. YMA Hnahthial leh Pu C. Zonunmawia te chu an tel a ni.