1790/2024-2025

Dated Hnahthial the 28th August, 2024: Vawiin chawhma dar 11:00 khan Hnahthial DC Meeting Hall-ah Hnahthial District Bawrhsap Pi Lalnunmawii Pachuau kaihhruaiin 'Hnahthial District Level Nasha Mukt Bharat Abhiyaan' an thukhawm a, he hunah hian Annual Action Plan an siam bakah Master Trainer tur an ruat fel nghal a ni.

Meeting kaihruaitu District Bawrhsap Pi Rita Lalnunmawii Pachuau chuan ruihhloin kan ramah bu a khuar nghet tawh hlein Hnahthial District-ah pawh a bik takin Heroin No 4 a hluar hle tih hriat a nih thu a sawi a. Heng ruihhlo tithinte hian an sim theih nan hmalak a tul rualin la ti ve lote venhim hi a tul lehzual a ni tiin a tam thei ang berin school ah te, thalai pawl punkhawmnaah te leh naupang inkhawmnaah te awareness campaign neih a tul thu a sawi a. Ruihhlo an tih bul tanna - sikhar ei te, mei zuk leh sahdah hmuamte chu a nih thu sawiin heng zuk leh hmuam that loh zia pawh hi uar lehzuala kan inzirtir tel theuh a tul a ni a ti bawk.

Action Plan siam tur Sub Committee din nise tiin meeting chuan a relin hengte hi ruat an ni - Chairman: Pu Zothanmawia Khiangte, Addl. DC niin member atan Pu Beimosia Lapi Addl. SP, Dr. R. Lalsanglura, Sr. MO. Pi Rose Mary Hnamte, CDPO; Pu Micky Lalenkawla, DEO; Pu H. Hmingthanzuala, President Sub Hqrs. YMA leh Pu F. Zosangliana, President MJA Hnahthial District te ruat an ni a. Anni hian a rang thei ang berin Action Plan an siam ang a, District Level Nasha Mukt Bharat Abhiyaan ah thlen lehin District Level hian a ngaihtuah leh dawn a ni.

Master Trainer turin mi panga - Dr. R. Lalsanglura, Sr. MO; Pu F. Lallawmzuala, Health Educator; Pu H. Hmingthanzuala, President Sub Hqrs YMA; Pu B. Lalremsanga, Secretary Sub Hqrs YMA leh Hoi Piloi atangin ruat an ni a. Anni hian Hnahthial District khaw hrang hrangah Awareness Campaign an nei thin dawn a ni.

Meeting-ah hian Hnahthial DC Office-a Officers te, SP hovin SP Office-a Officers te, ICDS, DEO, Health Department aiawh te, NGO hrang hrang aiawh te, Hnahthial Kohhran Joint Committee hruaitute, Lirthei khalha eizawng pawl aiawh leh Hoi Philoi aiawhte an tel a ni.