1791/2024-2025

Aizawl, the 28th August, 2024: Vawiin chawhma khan Pu Lalnghinglova Hmar, Minister of State, Labour, Employment, Skill Development and Entrepreneurship (LESDE) Department chuan Mizoram House, Chanakyapuri, New Delhi-ah National Skill Development Corporation-International (NSDCI) Advisor Dr. Dnyaneshwar Mulay leh Head of International Business Pu Sudhanshu Aggarwal te chu kawmin Mizoram thalaite tan Mizoram ngeia skill training lian tham kalpui dan tur an sawiho.

LESDE Minister Pu Lalnghinglova Hmar chuan Central Sawrkar hnuaia skill training project-ah Mizoram nena inmil zawk leh Mizo thalaite thiam zawng job role neih a pawimawh thu NSDCI hotute chu a lo hrilh a. Mizoram thalaite tan kut themthiam zirna, Skill Centre lian tham din tura hmalak dan turte an sawiho a ni.

Meeting-ah hian kut themthiam training bakah training chhuakte chhawmdawlna pek zui chungchang sawiho a ni a. A bikin rampawna hna hmute chu an kal dan leh thawhzui dan chungchangah dan ang thlapa kalpui a pawimawh thu tarlan a ni a. A hma thei angin NSDCI aiawhte’n Mizoram tlawh a, Aizawl-ah meeting neih leh thuai nise tih a ni bawk.

Sports Minister ni bawk Pu Lalnghinglova Hmar chuan vawiin vêk khan Ministry of Finance, Department of Economic Affairs hotute kawmin, Asian Development Bank hnuaia Mizoram Sawrkar sports project tâng thenkhatte a sawipui bawk a ni.

Pu Lalnghinglova Hmar hi Pu John Tanpuia, Jt. Secretary, Sports & Youth Services Department leh Pu Henry C. Lalrawnkima, Secretary, Mizoram State Sports Council te'n an tawiawm a ni.