1792/2024-2025

Dated Aizawl: the 28th August 2024: Vawiin chawhnu dar 1:00 khan Vanapa Hall, Aizawlah Art & Culture Department hnuaia Institute of Music and fIne Arts (IMFA) 68th batch Graduation Day hun chu hman a ni a. Pu C. Lalsawivunga, Hon’ble Minister, Art & Culture Department chuan khuallian niin a hmanpui. He hun hi Pi Carol VLMS Dawngkimi, Director, Art & Culture Department chuan kaihruaiin, Art and Culture Department hotute bakah, IMFA zirlai nu leh pate, college hrang hrang zirlai thenkhatte leh mi pawimawh sawm bikte an tel a ni.

He hunah hian Khuallian Art & Culture Minister Pu C. Lalsawivunga chuan thu sawiin, IMFA a zirlai chhuak mai turte chu Mizo hnam zia leh nunphung vawng him tura an inpekna leh an thiamnate chu fakawm a tih tak zet thu a sawi a. Hnam nunphung vawng nung tlat zel tura fuihin, "Hnam changkang apiangin mahni hnam nun vawnhim leh chawisan chu khawi hmunah pawh awm se, an ngaih pawimawh ber a ni" a ti a. Zirlai pass chhuak mai turte chu duhsakna hlan nghalin, hnam anga kan rohlu zo nunmawi, aia upate zahna leh tlawmngaihnate chu vawnghima chhawm nung zel turin kalkhawmte chu a chah nghal bawk.

Hun hmannaah hian IMFA zirlaite atangin lemchan leh lam hmuhnawm tak takte entirna neih a ni a. Hemi zawh hian result puanna leh certificate semna neih zui nghal a ni a. Zirlaite hnen atangin lam hmuhnawm tak tak Cheraw, Tangkawnga Vailak leh a dangte thlirho a nih bakah, zaithiam sawm bik te'n Mizo zai hmanga kalkhawmte an awih hnuin, Pu Lalchuailova, Dy. Director, Art & Culture Department chuan lawmthu sawiin hun hman a khar a ni.