4841/2024-2025

Dated Hnahthial, the 26th March, 2025: Hnahthial District Hockey Association (HDHA) buatsaih, MLA Cup Under-15 tournament chu vawiin khan zawh fel niin kharna hun hi Pi R. Lalramdinmawii, DCPO chuan a hmanpui a. Hmeichhe huangah Electric 'N' GSA champion in Mipa huangah Lungleng GSA te chu an champion a. PC Lalrinpuii, Junior National Player, Shrachi Rarh Bengal Tigers a khel mek chuan he Tournament hi a rawn chhim a ni.

Pi R. Lalramdinmawii chuan HDHA in Hockey lama tui naupangte tan hetiang inelna an buatsaih chu lawmawm a tih thu a sawi a. Naupangte chuan eng kawngah pawh tihduhdahna an tawk a nih chuan National Helpline No. 1098 ah report thin tura chahin naupang tanpui ngaite pui turin Child Welfare Committee, First Class Magistrate Bench thuneihna nei chu a din thu a tarlang bawk.

Naupangte chu mipat hmeichhiatna lamah fimkhur tur leh kum tling lova sex hmang lo turin a chah a. Naupang kum tling lo mipat hmeichhiatna hmanpui chu dan ang chuan pawngsual a nih thu tarlangin kalkhawm nu leh pate pawh an fate veng fimkhur turin a chah nghal a ni. 

Naupangte chu naupang an nih vang ngawtin dan chunga leng an nih bik loh thu sawiin naupang hum sual daite buaipui turin Police lamah pawh Special Juvenile Unit a awm tawh thu a tarlang a. Naupang hum sual daite chu Juvenile Justice Board-ah emaw Special Juvenile Police Unit-ah report zel turin kalkhawmte chu a chah nghal a ni.

Pu C. Lalremsanga, HDHA Secretary chuan report tawi pe in kalkhawmte hnenah lawmthu a sawi a. Hockey tournament buatsaihtu, MLA, Pu Jeje Lalpekhlua chungah HDHA hmingin lawmthu a sawi bawk a ni.

Pu H. Lalthanzuala, HDHA Vice President chuan Hnahthial in Mizoram Hockey tan an thawh hlawk thu sawiin naupangte chu Hnahthial leh Mizoram hming chawisang zel turin a fuih a. Hnahthiala Grass Root Training Centre-ah tournament a tel zawng zawngte chu in enroll vek turin a chah nghal a ni.

Grass Root Training Centre hi Govt. Middle School-ah awmin Class 5-8 (middle school), kum 10 tling chin tan a in enroll theih a. Kum khatah thla ruk chhung neih thin niin training hi a thlawn veka kalpui a ni bawk.

Final Hmeichhe huangah Electric 'N' GSA leh Lungleng GSA te chu inelin Lungleng GSA chuan Hnehna Nomawi chawi nan 7 - 0 in an khingpui chu an hneh a. Emy R Rotluangpuii (Goal - 2), Esther Lalpekhlui (Goal -1), Esther Lalrawngbawli (Goal -2) leh Lalremruati ( Goal -2) te chuan goal hi an thun a ni.

Mipa huangah Lungleng GSA leh Model Sporting Club te chu inelin Lungleng GSA Hnehna Nomawi chawi nan 3 - 0 in an khingpui chu an hneh a. Goal thum hi Emmanuel Lalduhawma'n a thun a ni.

Tournament Hmeichhe Top Scorer chu Esther Lalrawngbawli, Jersey no-7, Electric 'N' GSA niin Goal riat (8) a thun a. Mipa Top Scorer chu Emmanuel Lalduhawma, Jersey no-3, Lungleng GSA niin Goal ruk(6) a thun a ni.