4842/2024-2025

Siaha the 26th March 2025: Vawiin chawhma dar 11 khan Noaotla III (KM-10) ah Krishi Vigyan Kendra (KVK) Siaha District buatsaihin Strawberry Kût hman a ni a, Pu M Misael, Project Director, DRDO chuan khuallian niin hun a hmanpui.

Khuallian Pu M Misael chuan Siaha District chhunga khaw hrang hrang awm zingah Noaotla III chu District tihmingṭhatu khaw tlêmte zinga mi anih thu sawiin uar lehzuala strawberry ching tûrin kalkhawmte chu a fuih. Thei leh thlai tam tak chu Mizoram pawn aṭanga lakluh a nih laiin Noaotla III khuain Mizoram leilungah ngei strawberry an thar a, Mizoram an chawm thei chu a lawmawmin a leitu leh eitute tan pawh a manhlain ngaih a ṭha a, pawisa chevel pawh keimahni mi leh sate kutah ngei a lut chu lawmawm a tih thu a sawi bawk.

Pu M Misael chuan department lama hotu lo ni hmasate pawhin khaw thawkrim leh titak zeta thawk mi an ni tih an hriat avangin kut an thlakna hnu hmuh tur tam tak a awm a. Noatlah III khúa sawi rik anih rualin strawberry a lang nghal zel a, District tan pawh model village in ni, a ti. Siaha District ah centre of Excellence a awm lo anih pawhin rilruah chuan Noatlah III chu Siaha COE a ni, a ti bawk.

Vawiin hun hmannaah hian Strawberry Grower Society, Noaotla III member-te bakah sawrkar official ṭhahnem tak an tel a. KVK, Siaha District in kumin kum kal meka best farmer atan Pu Lengkhara thlangin Pawisa fai leh certificate an hlan a, certificate of appreciation mi 5 in an dawng bawk a ni.