4694/2024-2025

Dated Hnahthial, the 18th March, 2025: Vawiin chawhma dar 11:00 khan Hnahthial Bazar Ground-ah Hnahthial District Hockey Association buatsaihin MLA Cup Under 15 Hockey Tournament chu tan a ni a. Indian Women Hockey Player Nl. Lalremsiami Hmar chuan khuallian niin tournament hi a hawng a ni. Tun tumah hian team pariat (8), hmeichhia team thum (3) leh mipa team nga (5) an chhuak thei a ni.

Tournament hawnna inkhawm hi C. Lalremsanga, Secretary, Hnahthial District Hockey Association chuan kaihruaiin Nl. Lalremsiami Hmar chuan Hnahthial District Hockey Association (HDHA) ten Hockey tournament vawi thum lai an siam thei leh khuallian tura an sawm chu lawmawm a tih thu a sawi a. Hlawhtlinna chang tur hian mi mi vannei bik nih kher a ngaih loh thu sawiin pawimawh zawk chu kan rilru put hmang te, mahni inthunun theihna te, thawhrimna te, mahni inrintawkna te hi a ni a ti.

Hnahthial District Hockey Association Secretary, Pu C. Lalremsanga chuan Hnahthial District tan Hockey Ground tha tak sorkar in a siamsak dawn tih nimin Assembly session-ah tarlan a ni chu lawmawm a tih thu a sawi a. Kan ram hruaitu, Chief Minister, Sports & Youth Services Minister leh theih tawp chhuahtu bialtu MLA te chungah HDHA aiawhin lawmthu a sawi tak meuh meuh a ni a ti a. Sorkar-in Olympic 2036 inbuatsaihna a kalpui mekah Hnahthial District atanga Hockey player an tel ve ngei theih nan hma an lak mek thu a tarlang bawk.