No.740/2021-2022 

Hnahthial the 30th May 2021 - Chawlhkar khat chhung (31.05 - 07.06.2021) inkhuahkhirhna kalpui tur chungchang ngaihtuahin vawiin khan Hnahthial District Task Force on Covid-19 leh VLTF te chu an Chairman Pu H.Dolianbuaia kaihhruaiin a Office Conference Hall-ah an thukhawm a, Covid-19 do kawngah Hnahthial District hmalak tawhna hrang hrang thlirkirin ruahmanna thar an siam bawk.

Meeting kaihruaitu District bawrhsap Pu H.Dolianbuaia chuan Hnahthial District chu tun dinhmunah Covid-19 hri kai awmlohna a ni chu lawmawm a tih thu sawiin "kan za vaia thawhhona niin bialtu MLA pawhin min ngaihtuah em em a, DLTF angin lawmthu ka sawi a ni" tiin SoP tharah District chu a hma aiin thuneihna pek zau an nih thu a sawi a, "Hnahthial District hi kan khauh avangin kan dinhmun pawh a tha a, Dan bawhchiatna kan ngai thei lovin dan lova rawn luh kan remti lo, dan bawhchhiate reng reng chu dan hmangin kan hrem zel dawn a ni" tiin kalkhawmte chu Covid-19 inkaihhruaina (SoP) hrechiang turin a chah bawk a ni. 

DLTF Member Secretary Dr.Lalrengpuii Ralte leh Medical Nodal Officer Dr.R.Lalsanglura te report atanga a lan danin Hnahthial-ah Covid-19 hri kai enkawlna tur Covid Care Centre (CCC) 3 awm mekin  hengah hian mi 93 an enkawl theih a ni. Community  Covid Care Centre (CCCC) erawh la awm lo thungin hmalak nghal nise meeting chuan a ti. Hnahthial District-ah hian nimin thleng khan sample test mi 3033 awm tawhin heng zinga mi 25 chu positive tih hmuhchhuah an ni a, enkawl dam vek an ni tawh thung a ni. VLTF te pawhin an hmalakna hrang hrang tarlangin Inkhuahkhirh leh Lockdown kalpui mekah hian Chhuanchham an awm hriat ala ni lo bawk.

Meeting chuan Covid-19 laka Hnahthial District a him zel theihna turin District dang atanga Hnahthial District lut turten darkar 72 kalta chhunga negative result nei ngei se, ni 10 chhung quarantine ni bawk se an ti. Thawlehni, Ningani leh Inrinni zing dar 9:00 atanga tlai dar 5:00 thleng eng dawr pawh hawn phal nise, Inrinni bikah Zing Bazar hun pangngai kalpui nise, Hnahthial khaw pawn lam tan Thawhlehni leh Ningani chu Bank dawr hun atan ruahman a ni bawk.

Attachment

  • Loading attachment...