No.2628/2020-2020

Covid-19 dona kawnga hmalatu Hnahthial District Task Force leh Village Level Task Force hruaitute chu vawiin khan DLTF Chairman leh District Bawrhsap ni bawk Pu Vanlalmawia kaihhruaiin a Office Conference Hall-ah an thukhawm a, hmalak tawhna hrang hrang thlirletin hmalak zelna tur ruahmanna an siam a, state sawrkar in inkaihhruaina thar a siamte an zir ho bawk a ni.

Meeting kaihruaitu District Bawrhsap Pu Vanlalmawia chuan Hnahthial District chhungah tun thlenga Covid-19 vei hriat an la awm lo chu vanneihthlak a tih thu sawiin "he natna hian engtik hunah emaw chuan min rawn luhchhuah ve theih tho avangin mipuite kan fimkhur reng erawh a pawimawhin vei an lo awm thuta enkawlna tur Covid Health Centre pawh Hnahthial khawpui chhungah ruahman a ni" tiin tun dinhmunah lockdown chu thlah zalen deuh nimahse fimkhur ngaihna te nen rual tlang taka kalpui thiam tul a tih thu a sawi bawk a ni.

Security chungchangah harsatna liantham an neih loh thu Hnahthial SP Pu Lalbiakkila chuan sawiin Thingsai leh Ngharchhip ah chuan ramri-ah duty kalpui mek ala nih thu leh Cherhlun, Bualpui H, Muallianpui, New Ngharchhip leh Hnahthial-ah te erawh khawchhungah duty post an la kalpui zel tih a tarlang a, Covid-19 avanga Court case siam ngai tun thlengin Hnahthial District chhungah hian la awm lovin Curfew bawhchhia leh mask hreng lova lirthei khalh man erawh nei nualin heng mite pawisa chawi tlingkhawm hi Rs.55,800/- a nih tawh tih a tarlang bawk.

Medical Nodal Officer Dr.R.Lalsanglura chuan report pein tun thlenga State dang atanga Hnahthial District a rawn hawng hi mi 420 awm tawhin heng zinga mi 151 te chu Sorkar Quarantine Centre ruahman anih hnua rawn hawng te niin heng mite hi Govt Quarantine Centre ah dah vek an ni a, midangte chu mahni In a inkhunghran tir an ni. Hnahthial District chhunga Swab sample lak tawh mi 133 te result pawh chhuak kim tawhin an Negative vek a, lak loh mi 2 awmin lak thuai tum a ni a, Quarantine Centre ah mi 6 an la awm mek bawk a ni. Vawiin vek khan Hnahthial khawpui chhunga Quarantine Centre luah tawh loh te chu Disinfection team te chuan an kah thianghlim bakah Bank leh hmun lunlai an kap thianghlim bawk a ni.

State sawkarin partial lockdown inkhaihhruaina siam pawh Election Officer Pu H.Lalramliana kaihhruaiin zir ho a ni a, Sobji Bazar pui hawn dan tur pawh Hnahthial North-II VLTF ten ruahmanna lo siam se tih a ni.

Attachment

  • Loading attachment...