No.6796/2020-2021

Covid 19 dona chungchanga hmalatu Hnahthial District Task Force chu an Chairman leh District bawrhsap ni bawk Pu Vanlalmawia kaihhruaiin a Office Chamber ah an thukhawm a, hmalak tawhna hrang hrang thlir kirin hmalak chhunzawm zel dan tur sawiho a ni a, ruahmanna an siam nghal bawk.

Meeting kaihruaitu District bawrhsap Pu Vanlalmawia chuan Covid 19 do kawngah sum a hautak viau laiin Hnahthial  District erawh chu leiba awm lutuk lova an la inenkawl chhoh theih thu sawiin "ei leh bar kan mamawh reng  angin hmasawnna hnathawktu turte lo indan a, thawh phal loh ngawt hi a rem tawh lo a ni" a ti a. Vaccine peih anih veleh a tul anga pe chhuak tura sawrkar a inpuahchah mek thu a sawi bawk a ni. 

Member  Secretary  Dr.Lalrengpuii Ralte leh Medical Nodal Officer Dr.R.Lalsanglura te report atanga a lan danin Hnahthial District chhungah Covid 19 vei hmuhchhuah mi 15 awm tawhin enkawl dam vek an ni tawh. Mi 957 te Swab sample endik tawh niin chungte chu RT-PCR ah mi 248, RAgT ah mi 276 leh Truenat-ah mi 433 te an ni. Hnahthial District chhunga khunghran tawh zawng zawng hi mi 663 awm tawhin mi 630 te chu an hun hmang zovin chhuah tir an ni a, mi 33 khunghran mek an la awm a ni. Covid-19 dan bawhchhia Hnahthial District chhungah mi 1764 man ni tawhin chung mite pawisa chawi tlingkhawm chu Rs.1,88,500/- a ni 

Meeting  chuan Hnahthial District  chhunga khaw thenkhat chu Sorkar ruahmanna zawm lova mahni duh dana kal thin an awm thu tarlan niin chung khuaa VLTF hruaitute chu sorkar ruahmanna zawm tura hrilhhriat thar nise an ti. Tun dinhmunah Hnahthial District chu Covid-19 awmlohna a ni chu meeting chuan lawmawm an tih thu sawiin krismas leh kumthar vuakvet lo thleng turah pawh VLTF, Police leh Executive te chu ngawrh leh khauh zawkin duty se an ti.