No.6008/2020-2021

Hnahthial District Task Force on Covid-19 chu vawiin chawhnu khan an Chairman leh District Bawrhsap ni bawk Pu Vanlalmawia kaihhruaiin a Office Conference Hall-ah an thukhawm a, hmalak tawhna hrang hrang thlirkirin hmalak zel dan tur ruahmanna an siam.

Meeting kaihruaitu District bawrhsap Pu Vanlalmawia chuan tun dinhmunah Hnahthial District-ah Covid 19 vei awm loh thu sawiin hmalatu zawng zawngte chungah lawmthu sawiin theihtawp chhuah chhunzawm zel turin a sawm a ni

Meeting-ah hian DLTF Hnahthial, Member Secretary Dr.Lalrengpuii Ralte leh Medical Nodal Officer Dr.R.Lalsanglura te chuan report pein Hnahthial District chhungah Covid-19 do tan tirh kumin February atangin positive mi 5 hmuchhuak tawhin heng mite hi enkawl dam vek an ni tawh a, enkawl dam zinga Covid Care Centre chhuahsan hnuhnung ber te hian Ni 26.Sept.2020 khan an chhuahsan a, tun thlengin Covid hri vei hi Hnahthial District ah hmuhchhuah an awm tawh rih lo a ni. Covid-19 dona kawngah Volunteer-a inpe damdawi lam thiam Doctor, Pharmacist, Lab.Technician etc mi 30 vel chu Hnahthial District chhungah an thawk mek a, tun dinhmunah quarantine mi 31 awm mekin heng zinga mi 2 te chu Sorkar quarantine Centre ah awmin midangte chu Company ho quarantine an ni. Swab sample endik tawh zawng zawng hi mi 489 ni tawhin chungte chu RT-PCR ah mi 248, TrueNat ah mi 155 leh RAgT ah mi 86 endik an ni.

Hnahthial District chhunga hmasawnna hnathawk mek Company hrang hrang - ABCI, Sadguru, BIPL leh SLT Infracon ten an hnuaia hnathawkte inkhunghranna hmun an siamte chu meeting ah hian thlir niin a hmunah enfiah vek a nih tawh thu leh tha thawkhat viaua an hriat thu tarlan a ni. Inrinni tuka Hnahthial Bazar pui kalpui dan pawh thlir ho niin VLTF ten lo en zui zel se an tih bakah October Ni 15 atanga Zirna In hawn chungchang pawh thlir ho a ni bawk.

Meeting chuan Mizoramah Covid-19 vei tlem tial tialin lang mahse ala reh loh vangin nasa taka darh thei reng ala ni a, mitinte inthlah zalen mai lovin sorkar ruahmanna te zawmin fimkhur zui zel a pawimawh a ni an ti a. Kut Silfai, Hmaituam leh Social distancing te ngai pawimawh chhunzawm zel turin mipuite an chah a ni.