No.6007/2020-2021
Aizawl. 12.10.2020 : Vawiin khan Pi Lallianpuii MIS, Director, Information & Public Relations Department chuan ninga (5) awh tur Online Art Workshop chu a office chamber atangin a hawng. He Workshop hi Information & Public Relations Department leh Mizoram Art Development Society(MADS) tangkawp in an buatsaih niin lemziak mi 57 an tel a ni.

Pi Lallianpuii chuan kan beisei loh hripui CoVID-19 in khawvel a run a, hei hian keini chenna ram ngei pawh nunphung min tibuai hle a, Art lamah pawh duh angin hmalakna a kal chak thei lova. Chutiang karah tunah Online Workshop kan nei thei hi kan vannei hle a ni tiin, he workshop hi a tel ten Art lama hmasawnna duhawm tak kan neih ngei theih nan thahnem ngai tak leh a tangkai thei ang bera hmang turin a tel zawng zawng te duhsakna a hlan a ni.

Pu Laltanpuia, President, MADS pawhin Sorkar leh department ten hun harsa tak kara ruahmanna tha tak an siam sak avangin lawmthu sawiin hun khirh karah pawh lemziak mite harsatna hria a hmalam an pan theih nan a Online Workshop an buatsaih sak chu lawmthu a sawi.

Online Art Workshop ah hian Aizawl mai bakah Bilkhawthlir, Ruantlang, Khumtung, Lunglei leh Kolkata atangin an tel a ni.