No.965/2021-2022

Hnahthial the 14th June 2021 - Hnahthial District Task Force on Covid-19 leh VLTF hruaitute chu vawiin chawhnu khan an Chairman leh District Bawrhsap ni bawk Pu H.Dolianbuaia kaihhruaiin a Office Conference Hall-ah an thukhawm a, Bazar ni ah Auto rickshaw leh Taxi service phal sak nise an ti.

Meeting kaihruaitu District Bawrhsap Pu H.Dolianbuaia chuan Covi-19 hrileng dona kawngah Hnahthial District chhunga VLTF, Sorkar hnathawk leh mipuite tanrualna a that thu sawiin theihtawp chhuaha tan la thar zel turin kalkhawmte a sawm a ni.

Covid-19 laka inkaihhruaina (SoP) chungchang sawifiahin Hnahthial SP, Pu Lalbiakkila chuan "kan kuta thuneihna a awm hian hman sual palh a awlin kan fimkhur a ngai a, kan tih tur leh tih loh tur hi kan hriatchian a ngai a ni" tiin duty kalpui zelna turah dan hnuaiah thahnem ngai taka hmala turin kalkhawmte a chah a ni. 

Meeting-ah hian Medical Nodal Officer Dr.R.Lalsanglura report atanga a lan danin hun rei tak chhung Hnahthial District-ah Covid-19 hrikai an awm loh hnuin nimin (Pathianni) khan Hmeichhe pakhat kum 23 mi Quarantine lai chu a Positive tih hmuhchhuah niin Covid Care Centre Hnahthial-ah dah luh nghal a ni. Ti hian tun dinhmunah Hnahthial District-ah sample endik mi 3299 awm tawhin heng zinga 26 te chu Covid-19 hrikai tih hmuhchhuah an ni a, mi 25 te chu enkawl dam an ni vek tawh a ni. Govt Quarantine Centre-ah mi 13 leh Home Quarantine mi 3 an awm mek tih tarlan a ni bawk

Meeting chuan Chawlhkar khat chhunga Ni 3 - Thawhlehni, Ningani leh Inrinni te chu Dawr hawn leh Bazar ni atan kalpui chhunzawm tha tiin heng niah te hian Hnahthial Auto Rickhsaw Association-in Service phal sak tura an ngenna chu pawm sak an nih bakah Taxi pawh Serice phalsak nise an ti a, Hnahthial Town chhung bak erawh service phalsak an ni lo thung a ni. Hnahthial khawpui chhunga Thingpui dawr leh Restaurant te chu an dawr chhungah tumah chawlhtir lovin an thil hralh turte chu pack-in pe chhuak mai thin se an tih bakah Hnahthial khawpui chhunga duty point hrang hrangah VLTF te chu chhun lamah duty tel tawh lovin Sorkar hnathawkte chauh duty thin se, VLTF te chu Chhim lam leh Hmar lam kawtchhuahah chhun leh zanin duty chhunzawm se, khawpui chhung duty point-ah pawh zan lamah duty thin bawk se tiin meeting chuan a rel a ni.


Attachment

  • Loading attachment...