No.964/2021-2022

Aizawl, 14th June, 2021 : Mizoram Sawrkarin mipuite ration buhfai chanvo a tih tlem sak anga tun hnaia social media-a thu dik lo thehdarh chungchangah mipuiten thil awmzia kan hriat fiah theihnan a nih dan phung dik tak hetiang hian tarlan a ni e.

National Food Security Act, 2013 hnuaia Section 3(1) a inziak angin priority household ration card (card hring) neite chanvo chu member pakhat tan thla khatah buhfai 5 kilograms (kg 5) a ni a, AAY ration card (card eng) neite chanvo chu card pakhat tan thla khatah buhfai 35 kilograms (kg 35) a ni. Buhfai khulna man hi Rs. 3 per kilogram (kg 1 cheng 3) a subsidise a ni. Central Sawrkar pawhin hetiang hisap hian NFSA buhfai tur pawh min rawn pe thin a ni.

Hetih lai hian National Food Security Act, 2013 in a huam ve chiah loh, State Sawrkarin tunhma atanga ration card a lo pek chhuah hi chhungkaw tam tak an awm bawk a, hengte hi card var pek an ni a, an quota hi thla khatah mi pakhat tan 8 kilograms (kg 8) State Sawrkarin a tuk a, an buhfai ei ve tur erawh hi chu open market atanga lei niin, an buhfai khulna man pawh hi State Sawrkarin Rs. 15 per kilogram (Kg. 1 cheng 15) in a subsidise ve thung a ni.

Chutih rualin, dan hnuaia PHH (card hring) te chanvo hi APL (card var) te quota ai pawha a tlem avang leh APL (card var) te lak zat tal an lak ve theihna’n State Sawrkar chuan open market buhfai a lei atang hian thla khatah mi pakhat tan 3 kilograms (kg 3) hi a chan tir ve a, hei erawh hi chu Rs. 15 per kilogram (kg 1 cheng 15) thovin an khul ve thin ta a ni.

Tunah hian PMGKAY-III hnuaiah Sawrkar Laipuiin NFSA beneficiary - AAY leh PHH - te tana thla khata mi pakhat tan a thlawna buhfai kg 5 zel a rawn phal tak avangin thla khatah PHH card holder chhungkua-a mi pakhatin kg 10 a dawng thei ta a, chuvang chuan APL card holder te aia la tlem zawk an nih tak loh ah chuan Mizoram Sawrkarin additional kg 3 @ Rs.15/- per kg a belh thin chu tihtawp rih a ni a. PMGKAY-III hnuaia buhfai a thlawna sem a tawp hunah kg 3 belha sem thin hi chhunzawm leh a ni ang. Hei hi nikuma PMGKAY-II hnuaia April-November, 2020 chhunga a thlawna buhfai kan dawn pawha kan lo kalpui dan a ni.

Mipuite buhfai chanvo chhuhsakna emaw cut sakna a awm love.