No.4192/2020-2021    

District Level Task Force on Covi-19 Hnahthial District chu vawiin khan an Chairman leh District Bawrhsap ni bawk Pu Vanlalmawia kaihhruaiin a Office Conference Hall-ah an thukhawm a, Hnahthial District chhungah Covid-19 vei mi pahnih an awm mek thu leh an dinhmun a hlauhthawnawm loh thu tarlan a ni. 

Meeting kaihruaitu District Bawrhsap Pu Vanlalmawia chuan "hun engemawchen kha Mizorama Covid-19 vei awm lohna District awmchhun kan ni a, tun dinhmunah erawh pahnih kan neiin Damdawi lam thiam ten sorkar ruahman angin an enkawl mek a ni" tiin  mipui tan chiaina leh ralkhelna tur a awm loh thu sawiin "kan fimkhur zual zel erawh a tulin Mask vuah, Kut silfai ngun leh Social distancing kan kalpui that a tul bakah sorkar thupek leh ruahmanna te kan zawm a pawimawh hle a ni" a ti a. District Task Force pawhin theihtawp chhuahin hma a lak reng thu a sawi bawk a ni. 

Hnahthial SP Pu Lalbiakkila chuan venhimna lama an hmalakna hrang hrang sawiin Hnahthial District chhunga Myanmar nena inkal pawhna hrang hrang March 2020 atanga khar chu Aug Ni 8 atangin tihtawp a nih thu leh Bungkhawkaiah erawh  Police an la duty chhunzawm zel tih a tarlan bakah Covid-19 kawnga dan bawhchhia mi 562 te chu pawisa chawitir an nih tawh thu leh chung mite pawisa chawi tlingkhawm chu Rs.60,000 chuang a nih thu a sawi a ni 

Member Secretary Dr.Lalrengpuii Ralte, MO Hnahthial chuan chuan report pe in Govt Quarantine Centre Hnahthial-a awmte swab sample lak, ZMC-a thawn te nizana result chhuakah hnam dang (Vai) pakhat Company-a thawk, Assam atanga rawn chho chu a positive thu leh Covid Care Centre-ah dah luh nghal a nih thu a tarlang a. District Hospital Hnahthial-ah Covid-19 vei leh vei loh enfiahna khawl TrueNat chu hman theih mai turin peihfel a nih tawh thu leh a enkawltu tur Lab.Technician pakhat pawh rawih tan a nih thu te a tarlan bakah Covid 19 pamphlet chu Hnahthial District chhung khawtinah semchhuah a nih thu a tarlang bawk a ni.

Medical Nodal Officer leh MO Hnahthial ni bawk Dr. R. Lalsanglura pawhin report pein tun dinhmunah Hnahthial District chhungah khunghran mek mi 40 an awm thu a sawi a, heng zinga mi 23 chu Govt Qurantine Centre-a awm niin mi 17 te chu Home Quarantine an ni a. Positive mi 2 enkawl mek pawh Sorkar ruahman ang thlapa enkawl an nih thu a sawi bawk a ni.

DLTF Hnahthial vawiina meeting chuan Bungkhawkai Border a duty Police te tanpui nan Rs. 10000/- pek nise, KVK farmer Hostel chu Covid Care Centre atan hman nise, Inrinni zing Bazar na hmun atan MRB atanga HBSC Playground tawp thleng Foothpath hman nise an tih bakah Sorkar thupek chhiatni thatni inkaihhruaina chu Hnahthial Group YMA in an hnuaia YMA Branch tinah pe vek sela, Vegetable Supply Chain pawh  SDHO kaihhruainain VLTF te nen ruahmanna siam nise an ti bawk a ni.