No.4193/2020-2021   

Dated Khawzawl the 18th August, 2020 : Tun thla ni 27 a Village Council Election neih tura inbuatsaihna kalzelah  vawiin khan Khawzawl district huamchhunga Village Council 38 a Returning Officer leh Presiding Officer tura ruatte tan BRC Training Hall-ah training buatsaih a ni a, inthlanna kalpui dan tur leh vote chhiar dan turte inhrilhhriat a ni.

He hun  Asst. District Election Officer (ADEO) Pu James Lalnithanga, Khawzawl SDO Sadar ni bawk kaihhruaiah hian  Pu Lalrohlua, Addl DC & Convener, Model Code of Conduct ni bawk chuan Khawzawl district siam anih hnua VC inthlan tum khatna tur  chu thil chhinchhiah tlak tak a ni a, inthlanna felfai tak a hnua chhui zui tur  hnu pawr awm lo ni thei se tih hi kan duhthusam a ni, a ti a. DC Office a thawktute chauh ni lovin ataka  khawihtu Official te an pawimawh zual thu sawiin, VC inthlan chu  State Election Commission kaihhruaina hnuaia neih anih tur thu a sawi a.  VC thlan hunah chuan MLA leh MP thlan tuma  hman thin EVM  leh VVPAT khawlte hmang lovin  Ballot Paper hmanga vote thlak tur anih thu a sawi bawk.

Covid-19 hrileng vanga inkaihhruaina dante inthlan hunah pawh ngaihpawimawh chhunzawm zel anih dawn thu sawiin, Pu Lalrohlua chuan  Social distancing,  hmaituamna vuah, Polling Booth a lut zawng zawngte hming ziah thlip thlep, Phone an neih chuan an phone number-te ziah tih te leh Hand Sanitizer hman tih te kalpui  a ngai a ni, a ti a. Polling Official-te kutah mawhphurhna sang tak a awm avangin ngaihtuahna fim leh inthununna tha tak nei tura chahin, chetsual theihna lakah fimkhur hram hram turin a chah nghal a ni.

Vawiin Training-ah hian chawhma lamah Returning Officer 38 te tan Pu James Lalnithanga, ADEO in inthlanna kalpui dan tur chungchangah zirtirna pein, Pu H. Lalramenga, AERO in vote chhiar dan turah zirtirna a pe a. Chawhnu lamah Presiding Officer 52 te tan Training hi buatsaih niin Dr. Saithangpuia, AERO in inthlanna kalpui dan turah zirtirna pein, Pu H. Lalramenga, AERO in vote thlak dan turah zirtirna a pe a. Vawiin training-ah hian  Returning Officer leh Presiding Officer tura ruatte an tel kim thei a ni.