No.4683/2020-2021

Covid 19 hrileng do kawnga hmalatu Hnahthial District Task Force on Covid-19 chu vawiin khan an Chairman leh District Bawrhsap ni bawk Pu Vanlalmawia kaihhruaiin a DC Conference Hall-ah an thukhawm a, hmalak tawhna te thlirkirin hmalak chhunzawm zel dan tur an sawiho

Meeting kaihruaitu Pu Vanlalmawia chuan Covid 19 do kawngah DLTF Hnahthial thawhhona leh mipuite thuawihnaah lawmthu a sawi a, "engchen nge he natna hian min chenchilh dawn tih a hriat loh avangin a dona kawngah thawhhona tha kan neih zel a pawimawhin kan fimkhur zual zel a tul a ni" a ti.

Hnahthial SP Pu Lalbiakkila chuan Security chungchanga an hmalakna tarlangin Covid-19 dona kawnga dan bawhchhia mi 712 an man tawh thu leh chung mite pawisa chawi tlingkhawm chu Rs.82,500/- a tlin tawh thu a tarlan bakah Hnahthial khawpui chhungah Zan dar 8:30 atanga zing dar 4:30 thleng chu curfew kalpui reng ala nih avangin Police ten ngawrh takin duty an kalpui thu a sawi bawk

DLTF Hnahthial member Secretary leh Medical Officer ni bawk Dr.Lalrengpuii Ralte chuan report pein Hnahthial District chhungah Covid-19 vei mi pahnih an awm mek thu leh Covid Care Centre ah enkawl mek an nih thu a sawi a, heng mite enkawlna senso chu a thlawn vek a nih thu a sawi bakah District Hospital Hnahthial a Covid-19 vei leh vei lo endikna khawl Micrco RT-PCR (TrueNat) dah chu hman theih turin peih fel a nih tawh thu leh ICMR atang pawhin phalna pek an nih tawh thu leh hawn thuai a nih dawn thu a sawi bawk

Medical Nodal Officer Dr.R.Lalsanglura pawhin report pein Hnahthial District chhungah quarantine mi 238 awm tawhin heng zinga mi 212 te chuan an hun an hmang zo tawh a, mi 26 te chu quarantine mek an la ni. Hnahthial District chhunga mi 246 te chu RT-PCR hmangin Covid-19 an vei leh vei loh enfiah tawh niin mi 43 te chu Rapid Antigen Test hmangin enfiah an ni bawk a, heng zinga mi pahnih (2) te chu an Positive tih hmuhchhuah a nih thu a tarlang a ni.

Meeting-ah hian Covid 19 do kawnga sorkarin ruahmanna a siam tharte zirho a nih bakah VLTF tin te chu tan la thar tura ngenin an huamchhunga dawr neite chu an mahni dawrtute chhinchhiahna mumal tak kalpui turin ngen nise an ti a, thil tul pawimawh hrang hrang an sawiho bawk a ni.