No.1740/2020-2021

Covid-19 dona kawnga Hnahthial District Task Force member te chuan vawiin khan an Chairman leh District Bawrhsap ni bawk Pu Vanlalmawia kaihhruaiin Pangzawl Damdawi In (PHC) leh Quarantine Facility bakah Govt Pangzawl High School hmun hma te tlawhin an dinhmun an enfiah a, Pangzawl Village Task Force hruaitute nen inkawmhona an nei nghal

Pu R.Lalrinawm VCP Pangzawl leh Dr.Lalhmangaihzeli, MO PHC Pangzawl kaihruaiin inkawmhona hun tawi neih niin Hnahthial District Bawrhsap Pu Vanlalmawia chuan thu sawiin "Covid 19 hian engtik hunah emaw chuan min kian san hun ala awm ang tih ring mahila engemaw chen hi min la chenhilh ang tih hre rengin a hma atanga kan lo inzirtir thin fimkhurna nen Covid hi kan nunpui thiam a tul a ni. Eizawnna tawp vek khawp te, Zirna tawp reng tur tein inkharkhip hi kalpui reng chi a ni lova inthlahdul hret te hi a ngai thin a. Chu chu kan hlauh loh vang a ni lova kan khawsak phungin a mamawh vang zawk niin fimkhurna vawng nung rengin Social Distancing leh Face mask vuah te ngaihpawimawh a tul a ni. Covid-19 hi hlauh loh tur tihna ni lovin hlauh avanga midangte buaipui hlei theilo khawpa kan awm chuan kan u leh nau mangang lo hawngte hian enkawltu leh tuamhlawmtu an nei dawn lova, sorkar ruahmanna te zawm chungin kan lo dawnsawn zel a tul a ni. Tun dinhmunah phei chuan Hnahthial District hi kan lan vanneiin kan district chhungah tumah vei an la awm lova Covid vei awm lohna District ni thei reng turin he natna do kawngah hian mitinte i tang tlang zel ang u" a ti bawk.

He hunah hian Nodal Officer leh Election Officer ni bawk Pu H.Lalramliana, Dr.R.Lalsanglura, MO, District Hospital Hnahthial leh DSP Pu Vanlalbiaka Joute ten mipuite tana hriat tur tul pawimawh hrang hrang an sawi bawk a ni.

Pangzawl Quarantine Facility-ah hian mipa 4 leh hmeichhia 3 an vaiin mi 7 khunghran mek an ni a. Village Task Force hruaitute hnenah hian Hnahthial District Bawrhsap Pu Vanlalmawia chuan Hand sanitizer leh Glove thahnem tak bakah Rs.5000 (Sang nga) a hlan a ni. 

State danga tangkhangte hruai hawn runpui neih mekah Hnahthial District mi 147 te chu hruai hawn tawh niin heng zinga mi 36 te Quarantine Centre atangin an chhuak tawh a, midang 101 te chu quarantine mek la niin District dang Quarantine facility ah mi 10 an la awm mek bawk a ni.