No.1739/2020-2021

Vawiin khan Lunglei Deputy Commissioner Pu V.Lalsangliana, IAS chuan Lunglei District chhunga Covid-19 positive vei hmuhchhuah hmasak ber khunghranna hmun BCM Ramthar Community Quarantine Centre (CQC) bakah PCI Ramthar CQC tlawhin helai CQC-a awm mek te leh duty-te a thlamuan a, an hman tur mask, sanitizer leh chawhmeh thlai thar thahnem tak a hlan. 

DC hi Magistrate Pi C.Laltleipuii leh CQC Officer In Charge Pu Tlangtimawia Zote, DAO ten tawiawmin BCM Ramthar CQC-ah hian Medical in charge Dr Dorothy Vanlalrinmawii, VLTF Chairman Pu H.Lalramliana leh duty dangten an lo dawngsawng a. Quarantine Center dinhmunte enfiahin, Security, Medical Team, ei leh in siamtu leh khunghran mekte biangbiakna an nei a ni. 

Lunglei DC Pu V Lalsangliana chuan inkhunghrang mekte hnenah thu sawiin an awmna chu Covid-19 natna vei hmuhchhuahna hmun ni mahse Disinfection Team ten uluk taka an tih thianghlim thu leh mangang lo tura fuihin an tawngtaipui reng thu a sawi a, chhel taka awma hriselna tha tak nen an chhuah thuai a beisei thu a sawi a ni. CQC a duty official-te leh VLTF-te thawhrimna leh inpekna ropui a tih thu sawiin positive case hmuh chhuah a nih hnuah hnual mai lovin huaisen takin an mawhphurnate tha taka an hlenchhuah zel avangin an chungah lawmthu a sawi a. CQC a awm mekte leh helaia duty-te an Swab Sample la vekin RT-PCR a test turin ZMC a thawn phei tura hmalak mek a nih thu a sawi. 

Lunglei District –in Covid-19 positive case pahnih nei tawh mah ila District mipuite tan chiaina tur a awm lova, sawrkar Department hrang hrang, VLTF-te leh tlawmngai pawl te leh kohhrante tanghovin Covid-19 do kawngah theihtawpa hmalak mek zel anih thu a sawi. Tin, Covid-19 positive damlo pahnih te pawh an dinhmun hlauhthawnawm a ni lova, Covid Care Centre (CCC), ETC SIRD Pukpuiah Medical Team ten uluk taka an vil reng thu a sawi a ni.

Tin, Lunglei DC hian Regulation 11(1)(b) of the Mizoram Epidemic Diseases (COVID-19) Regulations, 2020 behchhanin Community Quarantine Centre, BCM Ramthar chu containment area atan 04/06/2020 khan a puang a. Biak In Compound hung chhungah hian Deputy Commissioner-in phalna a pekte, Medical Duty, Security duty, VLTF duty leh he Community Quarantine Centre- a thawk tura ruat official-te bak mi tumah an lutin an chhuak tur a ni lo.