Vawiin khan Health & Family Welfare Minister Dr. R. Lalthangliana chuan Hnahthiala Independence Day vawi 73-na lawmna ah khuallian ni turin Hnahthial a pan a, Hnahthial a thlen hian Hnahthial mipuite chuan ropuin taka lo hmuakin an beiseina tihhlawhtlinsaktu anih avangin amah lawmna inkhawm Hnahthial Bazar kawn ah an buatsaih.

H&FW Minister, bialtu MLA ni bawk Dr. R. Lalthangliana hi Hnahthial khawdai DC Office kawtah lirthei thahnem takin lo hmuakin Hnahthial khawchhung an luh hnu ah Gate Tlangah Welcome Gate an siam a, heta tang hian motor atanga chhukin Bazar Kawn thleng hian kawng zawhpui a ni.

Amah lawmna inkhawmah hian Dr. R.Lalthangliana chuan thuchah sawiin Hnahthial District thar din alo ni ta chu Hnahthial mipuite, tlawmngai pawl hrang hrang te leh kohhranhoten thawihtawp chhuah a tan an lakna Pathianin mal a sawm na ani a ti a, malsawmna hmanrua atana a tang thei chu lawmawm a tih thu leh Sawrkar thar hotute thahnemngaihpuina avangin lawmawm a tih thu a sawi. District tharah India Independence Day hmanga India Flag pawhparh anih ngei theih nan nasa takin tan lak anih thu a sawi a, Hn ahthial District thar chu engtiat a zau pawh ni se a huamchhunga khaw hrang hrangte an lung a rual tlan phawt chuan District thangduang leh hmasawn an ni dawn a ni tiin tanrualna a pawimawhzia a sawi a, boruak tha tak kara District thar din a ni thei chu lawmawm a tih takzet thu a sawi. District thar hawn chu hmasawnna rabhi pawimawh tak ani tih an hriat avangin hmalakna tur pawh uluk taka ruahman a nih thu a sawi a, DC office leh SP office te pawh din fel ani tawh a, a tihchangtlunna tur pawh ngaituah zel anih bakah Sawrkar Department hrang hrang pisa te pawh din turin hma lak zel a ni a, hetih kawngah hian sawrkar hotute pawhin an thlawp that hle thu a sawi. Hnahthial CHC pawh District Hospital a hlan kai theih tura buatsaih a tul dawn thu leh hemi atana mamawhte ngaihtuah mek anih thu a sawi a, Minister hian Ultrasound khawl thar leh Ambulance thar hian a hlan nghal bawk a ni. District inkalpawhna  kawng tha nei turin ruahmanna siam mek anih thun pawh sawiin Hnahthial-Haulawng road leh Chhipphir-Pangzawl road pawh a rang thei ang bera sial anih tur thu a sawi.

Hnahthial Deputy Commissioner thar Pu Vanlalmawia, MCS pawhin thusawiin District thar anih avangin hmalakna tur a tam a, sawrkarin theihtawp chhuahan District tichangtlung btura hma alakna thlawp turin leh tha taka thawhho puiah Hnahthial mipuite a sawm a. Hnahthial SP Pu Devesh Kumar Mahla, IPS pawhin Hnahthial mipuite lawmpuina hlanin, SP hmasa ber atana ruat ani chu lawmawm a tih thu a sawi a, dan leh thupek kenkawh kawngah mipui thlawpna sawmin ram ralmuang tak anih avanga hnathawh nuam a tih thu a sawi a, mipuiten mamawhna  an neih apiangah engtiklai pawha biak theih tura a inhawn thu a sawi bawk.

Dr. R. Lalthangliana lawmna inkhawmah hian amah tawiawmtu Govt. Deputy Chief Whip Pu Lalrintluanga Sailo leh Health & Family Welfare Board Vice-Chairman Dr. ZR Thiamsanga ten thu an sawi a. Minister hi Mamit bialtu MLA Er. H. Lalzirliana bakah Sawrkar mipawimawh thahnemtakin an tawiawm a ni.

Vawiin Health Minister lawmna inkhawm hi Pu C. Khamluaia, SDO (Sadar), Hnahthialin kaihruaiin District thar neih vanga lawmthusawina hun hman a ni bawk.