No.1547/2021-2022

Hnahthial 25th July 2021: Covid-19 hrileng avanga inkhuahkhirhna kal mekah mi harsa te chhungkua tanpuina atana Hnahthial Officers’ Club (HOC) member ten pawisa an thawhkhawm chu vawiin (Pathianni) chawhnu khan Hnahthial khawchhung YMA Branch hrang hrang 8-ah leh District Hospital Hnahthial hnenah an hlan. 

Hnahthial Officers Club-ah hian member 49 an awm mek a, Covid-19 hrileng avangin mi tam takin ei bar an zawnna kawngah hna thawk tha thei lovin harsatna an tawk tih hriain tanpui nan an theih ang ang thawhkhawmin Rs.1,50,500/- a tling khawm a ni. Hnahthial khawpui chhung veng hrang hranga tanpui ngai nia an hriat chhungkaw 47 thlang chhuak nimin khan an President Pu Lalremruata Sailo, SDO (Sadar) hovin HOC hruaitute chuan YMA Branch hrang hrang kutah an hlan a, chhungkaw pakhat tan Rs.2000/- zel pek a ni a, hetiang hi veng hrang hranga chhungkaw pekzet chu a ni :

1. Bazar - 5
2. Kanaan - 5
3. Chanmari - 5
4. Venglai - 4
5. Model - 4
6. Lungleng - 5
7. Peniel - 7
8 Electric - 12

Heng bakah hian District Hospital Hnahthial-a damlo tanpui ngaite tan Rs.20,000 an hlan bawk a ni.

Hnahthial Officers’ Club member-te hian Krismas dawnah pawisa thawhkhawmin mi harsate an tanpui thin thu an Secretary Dr.R.Lalsanglura chuan sawiin “tunah hian Covid-19 hrileng avangin chhungkaw tam takin ei leh bar dapna kawngah harsatna an tawk tih kan hriain heng mite tana luanchhuah hi tula kan ti a, kan theih tawk hi tam lo mahsela an harsatna engemaw tal alo phuhruk kan beisei a ni” tiin Hnahthial khawpawn VLTF hrang hrangah tanpuina pekchhuah leh thuai an tum thu a sawi bawk a ni. 

Hnahthial-a YMA Branch hrang hrangte chuan mi harsate dinhmun hriatthiam pui leh ngaihtuahtu Hnahthial Officers’Club a awm chu lawmawm an tih thu leh thlamuanthlak an tih thu an sawi bakah an thil tih chu a Pathian thu hlein an hrait thu an sawi hlawm bawk a ni.

Attachment

  • Loading attachment...