1676/2024-2025

Dated Hnahthial, the 21st August, 2024: Vawiin chawhma khan Hnahthiala District AIDS Prevention and Control Committee (DAPCC) thutkhawmna chu Hnahthial Bawrhsap leh DAPCC Chairman ni bawk, Pi Rita Lalnunmawii Pachuau kaihhruaiin DC Meeting hall-ah neih a ni a. IEC campaign hnuaia 'India fight against HIV/AIDS & STI', September thlaa neih tur chu kalpui dan tur an rel ho.

Bawrhsap chuan Mizoram chu India ram pum ngaihtuah chuan AIDS lamah kan san thu sawiin Hnahthial District pawh AIDS vei an tamin hei hi thil ngaihmawhawm tak a nih thu a sawi a. Hnahthialah AIDS vei thanhnem tak an awm chu pawi a tih thu leh hei vang hian he awareness campaign neih tur hi a pawimawh takzet thu a sawi. He campaign neih tura huaihawttu zawng zawngte chu thahnem ngai taka thawk theuh turin a sawm nghal bawk a ni.

Chief Medical Officer leh DAPCC a Secretary ni bawk Dr R. Lalsanglura chuan Hnahthial chu District a hlankai a nih hnu a a vawi hnih nan DAPCC thutkhawmna hun neih theih a ni hi lawmawm a tih thu sawiin he IEC campaign hnuaia activities hrangte hrang awm turte chu sawi zauna hun a hmang a. Hemi campaign hnuaia activities awm hote tih hlawhtlin a nih theih dan turte chu he thutkhawmnaah hian sawi hona neih nghal bawk a ni.

HIV/AIDS leh STI dona tur atana IEC campaign huaihawt hi Hnahthial District-ah hian rally hmangin September ni 3 hian DC office atanga vai hawn (flag off) tura rel niin rally-ah hian High School, Higher Secondary School, SAS leh Hnahthial College te chu tel tura ruahman an ni a. He campaign ah hian Hnahthial District chhunga middle, high school, higher secondary school, college leh technical institutions te chu tel tura beisei niin activities hrang hrang - placard insiamsiak, debate, stalls insiamsiak, flash mob leh photo booth insiamsiak te hmanga inelna neih tur a ni ang.

National Aids Control Organisation (NACO) in a ngen angin thingtlang school-ah HIV/AIDS lama hna thawk tute (PATH, link workers staff-te) chu anmahni khaw huam chhung theuhvah HIV/AIDS chungchanga zirtirna chu zirlaite hnenah pe tura beisei an ni a. College/ technical institutions tinah  zirtirna kalpui tura ruahmanna siam niin hemi tur atan hian counsellor emaw thiamna nei bik (resource person) ruahman tura rel a ni bawk a ni.

HIV/AIDS leh STI chungchang inzirtirna hmanrua (pamphlet/leaflet/booklet) te chu in tinah sem tura ruahmanna lo siam tawh niin District tina health workers leh ASHA ten house to house visit an neih apiangin HIV/AIDS leh STI chungchang zirtir tel a, zirtirna hmanrua sem tel zel turin he IEC campaign hnuaiah hian lo rel tawh a ni bawk. Hei bakah hian District huam chhungah khaw hrang hranga service sumo/taxi/auto-ah te HIV/ AIDS & STI chungchang zirtirna sticker bel bawk tura rel niin heng hmanruate hi MSACS atanga dawn tur a ni ang.

IEC campaign chungchang rel anih hnu hian DAPCC hnuaia hmalakna hrang hrang awmte chu rel chhunzawm nghal a ni. He thutkhawmnaah hian Addl DC, Addl SP, DEO leh YMA Secretary te chu an tel a ni.