1754/2024-2025

Dated Hnahthial, the 27th August, 2024: Vawiin khan Hnahthial DC Meeting Hall-ah Hnahthial District Bawrhsap Pi Rita Lalnunmawii Pachuau kaihhruaina in Hnahthiala National Highway-54 kawng chungchangah meeting neih a ni a. He hunah hian Pu Zothanmawia Khiangte, Addl. DC; Sub Hqrs YMA hruaitute, NHIDCL, ABCI, Mathiyan bakah Tuipui D, Rotlang East leh Leite khawtlang hruaitu VC te an tel a ni.

Meeting kaihruaitu District Bawrhsap Pi Rita Lalnunmawii Pachuau chuan Hnahthiala National Highway chungchanga hmalakna kawng hrang hrangah kal khawm ho chu thawhhona tha neih tlan a tul thu sawiin NHIDCL a ni emaw, ABCI leh Mathiyan pawh ni se hmanrua leh thil dangah harsatna an neih chuan inpuih tlan a tul a ni a ti a. Kawng a chhiat hlimah a chhak lam ram neitute tan compensate a awm theih leh theih loh Lunglei-a CALA biak an nih thu leh CALA lam hian thu leh hla an la rawn neih loh avanga kawng chhak ko pawh laih theih a la nih rih loh thu te a sawi a. Sub Hqrs YMA Vigilance and Monitoring Committee Hnahthial ten kawng bal laia lirthei lian tlan theih loh tura structure an dah chu tha a tih thu sawiin tun dinhmunah highway pangngaiah hi chuan LMV chauh kal rih tura a duh thu a tarlang bawk.

Meeting thurel dan chuan ABCI lamin tuna kawng pangngai hi uluk takin lirthei tlan theih reng turin an enkawl ang a, hetih lai hian by pass laitu Mathiyan lam pawhin an kawng enkawl hi tha thei ang berin an enkawl ang tih a ni a. Hnahthial Truck neitute harsatna tawh, by pass chhuah dawna motor tang thin pawh sawilan niin he kawng enkawltu Mathiyan lam ten ni 3 chhung hun pe a, ngaichang turin an ngen a ni. Kawng minna lai by pass a gabion wall siam ngai pawh ni thum chhunga thawh tan theih an inrin thu Mathiyan lam chuan an sawi a ni.

Bawrhsap chuan vawiina meeting thu leh hla hi an ngaihven zui reng tur thu sawiin, NHIDCL, ABCI leh Mathiyan lamte hi an insawi anga an awm lova, hotu lian zawk lama thlen a tul a ni pawhin a tul anga hma an lak zel tur thu a sawi bawk.