1755/2024-2025

Aizawl the 27th August, 2024 : Vawiin khan School Education Department leh Doordarshan Kendra Aizawl-ten School Education Directorate Committee room-ah DD Mizoram channel-a Educational TV Programme (Zirna Huang) chhunzawm nan inremna an ziak. He inremna ziah thar lehah hian School Education Department aiawhin Director Pu Lalsangliana’n a ziak a, Doordarshan Kendra Aizawl aiawhin Head of Programme Pu C.Vanlalsiama’n a ziak bawk.

He hunah hian School Education Director Pu Lalsangliana chuan kum 2015-a bul ṭan Educational TV Programme chhunzawm zel a ni chu lawmawm a tih thu a sawi a. DD Mizoram chu thlirtu an tam a, khawpui chhung mai bakah thingtlang leh ram thenawm atangin an thlir thei a, a hlawkna teltu an tam thei hi a hlu hle a ni a ti. Educational TV Programme neih hi a tangkai a, Ministry of Education pawhin 'best practices' zingah a pawmsak a ni tih a sawi a. Zirna lam thil pawimawh chi hrang hrang puan chhuahna programme a awm thei hi a lawmawm hle a ni a ti bawk.

DDK Head of Programme Pu C.Vanlalsiama chuan School Education Department nen thawhdunna an ziak leh thei ta chu lawmawm a tih thu a sawi bawk a. School Education Directorate te, SCERT, MBSE leh Samagra Shiksha te ṭha taka thawhhona programme a ni chu a lawmawm hle a ni a ti. Education Department te nena thawkhova programme an siam chu DD Mizoram tan pawh programme ṭangkai tak a nih thu leh thawhhona chu chhunzawm zel theih ni se a duh thu a sawi bawk.

Pu C. Chawngthantluanga, Secretary & Convener, Programme Advisory Committee chuan kum 2015 a?anga thawhdunna neih tawh dan report pein Educational TV Programme chu School Education, SCERT, MBSE leh Samagra Shiksha te ṭanghova programme siam ṭhin a nih thu a sawi a, kumina thawhhona ziah chu a vawi 8-na a nih thu te, kum khat chhungin episode 52 tihchhuah tur a nih thu te, kum 2015 atanga August 2024 inkarah episode 363 tih chhuah tawh a nih thu te a sawi. September 2024 aṭangin kum khat chhungin chawlhkar tin Ningani apiangin tlai dar 5:55-6:25pm inkarah programme tihchhuah chhunzawm a ni dawn a, TV Programme hi Media Cell, School Education Department leh SCERT ten an siam leh dawn tih a report bawk.

School Education Department leh DDK Aizawl ten Educational TV Programme tihchhuah chhunzawmna atana thawhdunna tur thuthlung an ziahnaah hian School Education Director Pu Lalsangliana bakah SCERT Director Pi Zohmingliani te, MBSE, Samagra leh DDK hotute te an tel a ni.