3711/2022-2023
Vawiin chawhma dar 10:30 khan Venglai YMA Hall Hnahthial-ah Mizoram State Commission for Women leh SP Hnahthial District and Anti Human Trafficking Unit bultumin Hnahthial District chhunga Police Station hrang hranga Police Officer, khawtlang hruaitu te leh NGO hrang hrang hruaitute pualin ‘Capacity Building and Training Programme on Anti-Human Trafficking’ hman a ni a, he hun hi Pu Vineet Kumar, Hnahthial SP chuan a hawng a ni.

Pu Bijoy Gurung, Addl SP kaihhruaiah Hnahthial SP Pu Vineet Kumar chuan thu sawiin Hnahthial District chu mihring hmanga sumdawnna (Human Trafficking) awm lohna District kan ni tur a ni a, tunlai khawvelah chuan mihring hmanga sumdawnna hi a hluar tawh em em a, mihring hmanga sumdawng thin te hian mi ten harsatna leh buaina an tawhna te hi remchangah an hmang thiam em em thin a, kan hriat angin kan thenawm Myanmar buaina avangin Hnahthial District-ah mahni sahimna zawnga rawn raltlan engemaw zah an awm a, anni hian helama inhnamhnawihna remchang an neih theih avangin kan vil uluk pawh a tul hle a ni a ti.

SP chuan khawtlang hruaitute leh NGO hruaitu kalkhawm te chu thawhho puiah sawmin dan phal lohva sumdawnna beitu an hria a nih chuan a hnenah emaw, Police Station-ah emaw thlen thin turin a chah a, hetianga report tute hi an hming leh nihna thup tlat a ni tur thu sawiin, kan tanrual phawt chuan dan lova sumdawnna chi hrang hrangte hi kan tirem thei ngei ang a ti bawk.

He hunah hian hun kaihruaitu Pu Bijoy Gurung chuan course preview a nei a, Pi R. Laldinmawii, District Child Protection Officer, Hnahthial District chuan mihring hmanga sumdawnna (human trafficking) chungchang a zirtir a ni.