3712/2022-2023
Aizawl, the 28th February 2023: Vawiin chawhnu khan VIP Lounge, Lengpui Airport-ah Er Lalrinawma, Minister, Social Welfare & Tribal Affairs, WC&D, etc leh Pi Renuka Singh Saruta, Union Minister of State for Tribal Affairs an in kawm a. He hunah hian Ministry of Tribal Affairs hnuai a hmalakna kal mek te an sawi dunin Er Lalrinawma chuan Mizoram mamawh te Union MoS for Tribal Affairs hi a sawipui nghal a ni.

Er Lalrinawma chuan Vocational Training Centre(VTC) 5 kalpui mek chu mipuiin an chhawr tangkai tih a sawi a. Heng VTC te hi tunhnaiah a kalpuina tur sum a chat lak tih sawiin tha taka kalpui chhunzawm zel a nih theih nan Ministry of Tribal Affairs atanga Fund a lo kal chhunzawm zel an mamawh tih Union MoS hnenah hian a sawi a.

Ropuiliani Freedom Fighter's Museum, Kelsih sak mek chungchang pawh an sawi dun a. He Museum sak pumna atana mamawh zat te chu Ministry ah thlen a nih tawh thu sawiin Er Lalrinawma chuan he Fund an dil belh hi phalsak thuai an nih theih nan Union MoS chu hma la turin a ngen a ni.

Tunah hian Mizoramah Tribal te tihhmasawnna atana zirna sikul tha bik - Eklavya Model Residential School (EMRS) 6 a awm mek a, 5 sak mek a ni a, 6 dang pawh a sakna tur hmunhma remchan dan a zira sak tur a ni tih a sawi a. EMRS kalpui mekah te hian tui intur thianghlim pawh thlenna(water connection) leh a panna kawng pangai(black topped) chu sikul pahnih chiah a nih thu sawiin EMRS zawng zawng ten heng mamawh zual pawimawh bik hi an neih vek theih nan hma laksak turin Union MoS for Tribal Affairs hi a ngen nghal bawk a ni.

Pi Renuka Singh Saruta, Union Minister of State for Tribal Affairs leh Er Lalrinawma SW&TA Minister inkawmnaah hian Pu Madhup Vyas, Secretary, SW&TA, Pi Zodingpuii, Director leh Pi Donnie, Joint Secretary, SW&TA te pawh an tel a ni.