3713/2022-2023
Aizawl, the 28th February : Pu Lalruatkima I&PR Minister chuan vawiin khan Vanapa Hall-ah Chapchar Kut 2023 denchhena Art Exhibition buatsaih chu a hawng. Art Exhibition-ah hian Painting, Sculpture leh Thlalakte pho lan a ni a. Hawnna inkhawm hi Pi P.B. Lianthangpuii, Joint Director I&PR in a kaihruai a ni. Art Exhibition ah hian painting 90 leh thlalak 114 phochhuah a ni.

Pu Lalruatkima chuan Chapchar Kut hi Mizoten kan Kut neih zinga kan ngaih hlut ber, pipute hun atanga kan lak urhsun ber a ni a, hemi denchhena Art Exhibition buatsaih a ni hi a lawmawm a. Art hi eizawnna tha tak a tling a, Kut themthiamna - thlalak leh lemziak te hi uar deuh deuh turin thalaite a sawm a ni. Mizoram chuan ram hrang hrang 20 in tel khawmna G-20 Summit kan hunpui Chapchar Kut lai hian a thleng dawn a, ram hrang hrang atangin palaite an lo kal dawn a ni. He hun hi kan hnam zia rang - Zonun mawi tlawmngaihna, rinawmna leh huaisenna te kan pholanna hun remchang tak a niin kan hnam ziarang te kan pho chhuah thiam a tul hle a ni a ti.

Minister chuan Information & Public Relations Department hian chanchinbu mite nena thawhhona leh chanchin thar thehdarh bakah Art, Photo leh Film lam hmasawnna tur leh thalaite hmakhua thlir chungin, an tuina leh thiam zawng te dap chhuahpui turin Society hrang hrang te nen thawhhona tha tak neiin hmasawnna a kalpui mek zel a. G-20 Summit a palai lokal te hnenah Art Exhibition hmanga kan hnam ziarang pho lanna hun tha tak kan nei hi a hlu hle a ni a ti.

I & P R Department hian Mizoram Art Development Society (MADS) nen tangkawp  in Art lam tihhmasawn zel nan 2022-2023 chhung hian Art Workshop vawithum, Exhibition vawihnih, Solo Exhibition vawihnih, Outdoor Painting Workshop vawikhat a neih tawh bakah Lunglei-ah Art Festival a buatsaih bawk a.  I&PR leh Mizo Photographers’ Society(MPS) tangkawp chuan 2022 - 2023 chhung hian World Photography Day te, MPS kum 10 tlin lawmnan Photo Competition te a buatsaih a, heng bakah hian West Phaileng leh Champhai ah te Workshop leh Photo Competition te a buaisaih bawk a ni.