No.2474/2021-2022

Aizawl the 4th October, 2021 : Covid-19 hrileng dona inkaihhruaina chungchang thlir hovin vawiin khan Hnahthial District Task Force, Incident Commander, Nodal Officer leh VLTF Chairman te chu DC's Conference Hall, Hnahthial-ah Pi Saizikpuii, Addl DC kaihhruaiin an thukhawm a, ruahmanna hrang hrang siam thar a ni.

Meeting-ah hian DLTF Member Secretary Dr.Lalrengpuii Ralte tarlan danin Hnahthial District chhungah Covid-19 hri kai mi 566 hmuhchhuah tawh niin heng zinga mi 440 chu enkawl dam tawh an ni a, mi 125 enkawl mek la awmin mi pakhat a boral tawh a, tun dinhmunah tualchhungah Covid-19 hrileng hi a la awm niin a sawi bawk. Hri kai tam zawk hi RAgT hmanga hmuhchhuah niin TrueNat hmangin Primary Contact an endik vek thu a sawi a, Covid-19 Vaccine pekah an target atangin First dose 99% pek tawh an ni a, second dose hi 73% pek tawh niin October hian pek zawh tum a nih thu a sawi bawk a ni. Oxygen plant pawh District hospital Hnahthial-ah minute khata 250 ltrs. siam thei bun a nih tawh thu leh hemi atana Transformer 250 kVA pawh tih nun a nih tawh thu Dr.Lalrengpuii Ralte chuan sawiin October Ni 7 ah chuan peihfel hman tum a ni, a ti.

District Education Officer Pu Micky Lalenkawla tarlan danin Hnahthial District chhunga zirna In, Hnahthial leh Tuipui D a mite tih loh chu hawn vek tawh a ni a, Zirlai naupang 66 leh Zirtirtu 6 te chu Covid-19 hri kai an awm thu a sawi bawk.

Meeting chuan Pathian biak inkhawm chu phal ni tawh se, Kohhran hruaitute leh VLTF ten ruahmanna lo siam se an ti a, Nitinin zing dar 5:00 atanga tlai dar 5:00 thleng Dawr hawn, Auto Rickshaw leh Taxi Service remti bawkin Infiamna lama inelna -Tournament pawh VLTF te remtihna lain siam phal nise an tih bakah Hnathial khawchhung tih loh Zirna In chu School Management Committee, VLTF leh Zirtirtute ruahmanin hawn nise, Hnahthial khawpui chhung bikah chuan Class XII Science leh Commerce zirna hawn nise tih a ni bawk.