1758/2024-2025

Dated Hnahthial, the 27th August, 2024: Vawiin khan DC Meeting Hall Hnahthial-ah Hnahthial District Consultative Committee (DCC), District Level Review Committee (DLRC) leh District Level Security Committee (DLSC) thukhawmin Pi Rita Lalnunmawii Pachuau, DCC Chairman leh Hnahthial District Bawrhsap ni bawk chuan a kaihruai a ni.

Meeting kaihruaitu Bawrhsap Pi Rita Lalnunmawii Pachuau chuan hetiang meeting pawimawh tak kan nei thin hi lawmawm a tih thu sawiin sorkar hnathawk district head te pawhin an ngaih pawimawh a tul thu a sawi a. Bank lam leh beneficiaries te thlunzawmtu kan ni tih kan hriat reng a tul a ni tiin line department kal lo te chu insawifiah tura hriattir nise a ti bawk. Khua leh tui bank kalphung bakah an chanvo tura sorkar in scheme tha tak tak a duan ten an hriat theihna tura inhrilhhriat chu bank thawktute mawhphurhna a ni tiin bank hotute chu a tam thei ang ber financial literacy campaign nei turin a chah bawk a ni.

Pu Lalhlimpuia, Chief Manager, Lead Bank Office, Lunglei chuan Credit/Deposit Ratio- bank a mipuiin sum an dah luh (Deposit) zat za zela bank in mipuia sum an puktir (CREDIT) zat chhutna ah quarter hmasa a  60.73% chu tun quarter ah 62.93% a kai thu tarlangin RBI in a bituk zat za zela 60 an kai  ta chu thil lawmawm tak a ni a ti. Credit disbursement under ACP (Non- Priority Sector) a zirna (education) bik achievement a la nil chu zirlaite leh mipuiah inhrilhhriatna uar leh zuala pek a tul thu tarlan a ni a. A mamawhtu dik tak ten tangkai taka an hman theih nan theihtawp chhuah tura ngen an ni. Hnahthial District a Bank 3 awm (SBI, MRB leh MCAB) ten KCC Loan an pek dan te, MzSRLM hnuaia Self Help Group loan an pekchhuah te, PMEGP leh NULM hnuaia loan an pekchhuahte thlir ho bawk niin line department te leh bank te chu thawhhona tha zawk nen mipui harsatna sutkian a nih theih dan tur ngaihtuah hovin ruahmanna leh rawtna ngaihthlak ho nghal a ni bawk.

Thutkhawm hmasa in a an lo rel tawh hmachhawp hrang hrang bawhzui a nih dan thlirletna neih a ni a. Meeting-a tarlan a nih danin mipui hamthatna tura Sorkar laipui duan Social Security Scheme hrang hrang- PMJJBY, PMSBY leh APY  ah te Hnahthial District chhunga bank awmte dinhmun en ho a ni a. Loan rul tha lo (Non performing assets) chungchang pawh sawi ho ni bawkin quarter hmasa nen tehkhinin a tlahniam hret hret chu thu lawmawm tak a nih thu tarlan a ni. Hnahthial District a bank branch hrang hrang hnuaia savings account leh current accounts te chu March 2025 hmaa digitalized vek tawh tur a tih niin quarter hmasaa 48% chu pelh a nih tawh thu tarlan a ni bawk.

Vawiin thutkhawmah hian Line Department hrang hrang hotute bakah Chief Manager, LBO Lunglei, NABARD Lunglei, Lead District Office, RBI, Aizawl, Regional Manager MRB, RBO, Lunglei te bakah Hnahthial district chhunga bank branch hrang hrang aiawhte an tel a ni.