1140/2026-2027

Dated Hnahthial, the 23rd June, 2026: Vawiin khan Hnahthial DC Meeting Hall-ah Bawrhsap, Pi K. Vanlalruati kaihhruaiin District Level Narco Coordination Centre (NCORD) member-te chu an thutkhawm a. Hnahthial SP, Pu Shivam Siddharth bakah member hrang hrangten report pe in Hnahthiala ruihhlo tawlh tih reh nana hmalak dan tur hrang hrangte sawi ho a ni. 

Bawrhsap chuan Hnahthial chu District dang ngaihtuah chuan ruihhlo tawlh ruk a tlem deuh ni a a lan thu sawiin chutih rual chuan tan lak ngaihna tam tak a la awm thu a sawi a. Hnahthial chu border area a nih avangin luhka tam lo mah se ruihhlo tawlh rukna kalkawng pakhat a nih avangin theihtawp chhuah reng a tul thu a sawi a. NCORD member-te chu ruihhlo dona kawngah theihtawp chhuahpuiah turin a sawm nghal a ni. 

SP, Pu Shivam Siddharth chuan April ni 22 a State Level NCORD meeting-in a rel angin hma hrang hrang lak a nih tawh thu tarlangin ruihhlo do na turin 3 Years Action Plan pawh Excise & Narcotics Department leh Office dangte nen tangkawpin an duan tawh thu a tarlang a. Check Gate thar pahnih siam turin proposal duan a nih tawh thu sawiin Cherhlun leh New Ngaharchhip inkar chu drugs luhkawng (Hotspot) atan thlanchhuah a nih thu a tarlang bawk. Hei bakah hian hotspot dang pawh a tul dan azirin thlan chhuah leh tur a nih thu sawiin ruihhlo tawlhrutute chuan eng kawng pawh an zawh theih avangin border area mai ni lovin khawchhung hmun hrang hrangah te patrolling neih uluk leh zual a nih tur thu a sawi a ni. 

Thutkhawmnaah hian ruihhlo dona kawnga banpui pawimawh pali - Supply reduction, Demand Reduction, Harm reduction leh Monitoring chungchangte chipchiar zawka sawi ho a ni a. Enforcement leh khawtlang ten ruihhlo don nan anmahni zawn theuhva an tih theih hrang hrangte sawi ho nghal a ni. 

Thutkhawmnaah hian Addl. DC, Sr. CMO, SDO (Sadar), Addl. SP, END Asst. Commissioner, SDEO leh member dangte an tel a ni.