1141/2026-2027

Lunglei, 2026 Nikir thla ni 23: Vawiin khan Lunglei Municipal Council (LMC) Board of Councillors (BoC) chu an Chairman Pu Lalzuithanga kaihhruaiin Lunglei Convention Centre-a BoC Meeting Hall-ah an ṭhu khawm.

He ṭhut khawmah hian LMC sum hman dan kalphung, Revised Standard Operating Procedure (Re-SOP) for Utilisation of Funds under LMC chu ennawn leh niin, siam ṭhat ngai laite siam ṭhat a ni a. LMC huam chhunga lirthei hun man (Vehicle Parking Fee) sum lut hmanna tur rel niin, parking fee sum chu zaa za mipuiah let se tih kalpui mek chu chhunzawm ni se, tih a ni a. Parking fee tling khawm aṭang hian Lunglei khaw chhung lirthei chet vel dan leh mipuite him zel nan Traffic Warden rawih ṭha tih niin, LMC huam chhunga cable hrui hnawkte then fai ni se, tih a ni bawk.

He ṭhut khawmah hian Faina Puitu App nihphung leh faina kawnga hma laknaa hman ṭangkai a nih theih dan tur te thlir ho niin, a khawihtute nena thawh ho dan ngaihtuaha hma lak ni se, tih a ni a. Khawpui chhung bawlhhlawh sawngbawl dan, Solid Waste Management Rules, 2026 chungchangah Supreme Court thu chhuak angin a ṭul angte bawhzuia a rang lama tihfel ni se, Lunglei Municipal Council hman theih tur Bye-Laws pawh buaipui ni se, tih a ni a. October ni 31, 2026 ral hmain bawlhhlawh 30% tal chi 4-a thliar hran ni se, tih a ni.

Kawng sira zankhuaa lirthei dah (overnight parking) buaipui chungchangah Lunglei Municipal Council leh Local Council ṭang kawpa thawh dunna thuthlung chu a tawp tawh avangin LMC aṭanga hma lak dan tur sawi ho niin, Lunglei Municipal Council area-a lirthei hunna/dahna (garage) nei lote'n nei vek tura hma lak ni se, tih a ni a. Garage neih kim hun atan September ni 30, 2026 chu bituk a ni.

Sumdawn phalna (Trade License) pek chungchangah a hmun azira pawisa (fee) chawi tur zat thliar hran dan (zone classification & fee) leh Trade License nun hun chhung (validity) chu zir chian a, la rel ṭhat ni se, tih a ni a. Urban Local Body (ULB) Grant hmanga siam Hrangchalkawna Submersible Water Pump chu PHED kuta hlan remtih a ni.

Vawiina LMC Board of Councillors ṭhut khawmah hian Chairman Pu Lalzuithanga, Vice Chairman Pu K. Lalrinawma, Executive Councillor Pu Zorinsanga Hmar leh Pi Lalhruaitluangi Sailo te bakah, elected councillor-te an tel kim a. LMC Chief Executive Officer Pu Lalhmansanga leh Secretary Pu Lalremruata Sailo te'n an telpui bawk.