3463/2022-2023

Hnahthial the 2nd February 2023 - Mizoram a District khawpui dangte ang bawkin vawiin khan Hnahthial-ah lirnghing a thlen palha chhanchhuah leh chhawmdawl hnathawh dan tur a taka entirna Mock Exercise om Earthquake neih niin mawhphurhna hrang hrang neitu ten tha takin an chanvo an entir a ni.

He hun hi District Disaster Management Authority, Hnahthial bultumin an Chairman leh District bawrhsap ni bawk Pu R.Lalremsanga hovin DC Office, Police, Medical Department, Quick Response Team, Govt Hnahthial College NSS, Mizoram Home Guard te bakah YMA Bazar Branch leh Electric North Branch ten hun an hmang a, Hnahthial chu chawhma dar 10:00 khan Magnitude 8.7 a nâ lirnghingin Minute 1(60second) chhung a sawi angin ruahman a ni a, Ralkhel dar tih rik nghal niin chhiatna hi District Hospital, Govt Hnahthial College, Market Building Bazar veng, DC Office leh Govt Middle School-ah thlengin chhanchhuah leh chhawmdawl hi a tak ang thei berin ruahmanna fel tak hnuaiah chak takin kalpui a ni. District Emergency Operation Centre chu Incident commander District bawrhsap-in vilin Site incident Commander te leh Observer ten chhiatna thlenna hmun hi an thutchilh bawk a ni.

Mock Exercise neih zawh hian DDMA Chairman leh District bawrhsap ni bawk Pu R. Lalremsanga kaihhruaiin a Office Conference Hall-ah Addl DC, Incident Commander, Observer te leh Police te chuan meeting an nei chhunzawm a, Central sawrkar in a thil ngai pawimawh ber te zingah Disaster management hi a tel thu District bawrhsap chuan sawiin "engtik hunah nge, khawi hmunah nge chhiatrupna hi a thlen dawn kan hre lova, chutih laiin a lo thlen thulha chet lak dan kan lo zir lawk erawh a tul a, vawiinah hlawhtling takin hun kan hmang thei a, a lawmawm hle a ni" tiin mawhphurhna hrang hrang neitu ten tha taka an hlenchhuah vangin lawmthu a sawi a, kan hma lawkah National Disaster Response Force (NDRF) te nen hetiang hun hi neih leh tum a nih thu a sawi bawk a ni.