No.2541/2021-2022
Aizawl 8th october 2021: 2nd October atanga Hnahthial-a Faina Hapta 2021 hman chu vawiin khan Pi Saizikpuii Addl. DC chuan kharna hun hmangin "Hapta chu khar mah ila Faina erawh kan khar lo a ni" tiin kumtluana Faina kalpui chhunzawm turin khawtlang hruaitute a chah a ni.

Hnahthial-a Faina Hapta khar inkhawm hi Pu Lalremruata Sailo, SDO (Sadar) leh DUDO ni bawk kaihhruaiin DC Conference Hall-ah neih a ni a, Khuallian Pi Saizikpuii chuan India zalenna kum 75 lawmna pualin kawng hrang hrangah hmalakna kalpui a nih thu leh Faina lamah pawh theihtawp chhuah a nih thu sawiin "Veng, Pisa leh Zirna In hrang hrang ten fai tura kan hmalakna hi Hapta chhung atan chauh ni lo sela, kumtluan in hmang chho zel ila, mitinin mahni In leh a vel kan tih fai that reng chuan khawpui fai nih hi a har dawn lova, kan fai reng na na chuan thapui thawh chiam ngai lovin hahdam takin a fai theih a ni" a ti. Faina kawnga NGO hrang hrangte Zirna In leh Pisa hrang hrang hmalakna fakawm a tih thu pawh sawiin Faina Hapta chhung chauha hmalakna duh tawk mai lova kumtluana Faina kalpui tur leh sulsutu a tang zel turin khawtlang hruaitu kalkhawm te chu a chah bawk a ni.

Faina Hapta puala Thlalak intihsiakna leh Video tawi siam intihsiakna a ti tha thlan chhuah mi pathum ve ve te hnenah lawmman Thuziak leh Pawisa fai hlan an nih bakah phut let nei lova tunhma atanga vantlang hmun hma tihfai hna kalpui rengtu mi 3 -Pu Pc.Lalmuansanga, Pu H.Lalremruata leh Pu Pc.Thanghlira, Electric veng vek te hnenah chawimawina thuziak leh Pawisa fai Rs.1000 theuh hlan a ni bawk a. Faina Hapta puala inelna thenkhat -Veng fai, Zirna In fai, Pisa fai leh Chanchinbu lam hmala thate chu nakkum 2022 Republic Day-ah lawmman an hlan thung dawn a ni

He hunah hian Hnahthial khawpui chhunga YMA Branch hrang hrang aiawhte chuan Faina kawnga an hmalak tawhna leh khawpui fai inelna hmachhawn tura inbuatsaih chhunzawm an tum dan hrang hrang an tarlang bawk a ni

Hetih rual hian vawiin vek khan NSS Unit, Govt Hnahthial College leh UD&PA Deptt tangkawp chuan Hnahthial khawpui chhunga Vantlang zun In leh Inthiarna hrang hrang tih fai hna an thawk a, heng mite inpekna chu Pu Lalremruata Sailo, DUDO chuan fakawm a tih thu leh khawpui fai ni turin a chhunga cheng mipuite thahnemngaihna leh inlungrualna a pawimawh thu sawiin DC Office tual atangin a vailiam bawk a ni

Attachment

  • Loading attachment...