No.3805/2021-2022

Aizawl the 25th January ,2022: Ramchhung hmun dangte rualin vawiin khan District Election Office Hnahthial buatsaihin DC Conference Hall, Hnahthial-ah National Voters Day 2022 hman niin Vote nei tharte hnenah EPIC hlan niin Booth Level Officer hnathawk tha mi 3 thlanchhuah te hnenah BLO Award hlan a ni bawk.

Hnahthial-a National Voters' Day hmanna inkhawm hi Pu Lalneihthanga Colney, Election Officer chuan kaihruaiin District Bawrhsap leh District Election Officer ni bawk Pu R. Lalremsanga chuan  Election chu mitin huap a nih thu leh mipui ten a pawimawhna leh hlutna hriat thar reng a tul thu sawiin "Mitin hi MLA/Minister ni theilo mah ila ram inrelbawlna kawngah erawh kan vote hmangin kan tel vek thei a, Vote thlak hi khua leh tui kan nih anga kan mawhphurhna a ni. Kan ram a kal fuh leh fuh loh hi mipui (voters) ah a innghat thui hle a, voter tute pawh kan vote hlut zawng hi a inang vek a, pawimawh leh pawimawh lo bik a awm chuan loh avangin ram rorelna khawl chhiat leh that hi mipui voter-te mawh a ni" tiin Electoral roll-a inziah luh a tul thu a sawi a, South Tuipui Assembly Constituency chhunga BLO thawk tha mi 3 thlan chhuahte te hnenah BLO Award a hlan a, chungte chu 
1st -Pu P.Lalengmawi, Teacher, Govt M/S Khawhri
2nd - Pu F. Runremmawia, Teacher, Govt M/S South Chawngtui
3rd - Pu F.Lalhmangaihthanga, Teacher, Govt  P/S-III South Vanlaiphai

He hunah hian tun hnaia Electoral roll tlangzarh taka Vote nei thar zinga mi 3-te hnenah Pi Saizikpuii, Addl DC chuan EPIC a hlan bawk a ni. 

Hnahthial District chhungah hian South Tuipui Assembly Constuency-ah Service Vote nen a vaiin vote 15816 awm mekin Lunglei North leh Lunglei East bial khaw thenkhat Hnahthial District huam chhung ni si ah vote 6936 awm mek bawkin Hnahthial District-a tun dinhmuna vote awm zawng zawng chu 22,752 a ni.


Attachment

  • Loading attachment...