No.7836/2020-2021

Dated Hnahthial, the 18th March, 2021: Core Team on Skill Development Frame Work, Hnahthial District, Mizoram Youth Commission leh SIRD & PR Mizoram tangkawp in Hnahthial District chhung Thalaite tana Cement Mistiri Training an buatsaih Ni 45 chhung awh chu vawiin khan Govt Hnahthial College auditorium-ah kharna hun hman niin District bawrhsap Pu H.Dolianbuaia chuan khuallian niin a hmanpui a, training chhuakte hnenah Certificate leh hmanrua a hlan.

Hnahthial Bawrhsap Pu H.Dolianbuaia chuan Training chu thiamna tak tak ni lovin thiamna Kailawn rah tanna a nih thu sawiin training chhuakte chu an thil zirte eizawnna tlaka an hman theihnan taima taka thawk chhunzawm zel turin a chah a, Mizoram-ah Cement Mistiri-te an indaih loh thu sawiin "Mizo Cement Mistiri tam tak kan nung khawchhuak lo hi a manganthlak a, kan insiamthat a ngai hle a ni. Min ruaitute duhdan a thawh hi kan tih tur a ni a, dawhtheihna kan nei lo lutuk leh Mei zuk chawlh kan nei rei thinte, a tawpna tur leh kan hna lanna tur taka kan uluk tawk lo fo thin te hi kan Work culture-a tha lo leh siam that ngai a ni" tiin hnamdangte hnathawh dan thlirin Mizote hian hna kan lak nat loh thu sawiin ni khat-ah darkar 5 vel bak kan thawk meuh lo tih a sawi bawk. "Mi hlawhtling ni turin retheih hmasak ngam a ngai a, harsatna leh manganna hmunah pawh rinawm leh taima taka thawh tang tang a ngai a ni" tiin Pu H.Dolianbuaia chuan a mimal hun lo hman tawh dan a sawi bawk a ni. 

Training kharna inkhawm hi Pu K.Lalsangluaia, Principal Govt Hnahthial chuan a kaihruai a, Core Team Member Secretary Dr.K.Lalzuimawia chuan report pein Cement Mistiri Training hi Ni 4th February 2021 atang khan kalpui tan niin Hnahthial District chhung khaw hrang hrang atangin training tur mi 30 lak zingah mi 23 te chuan an training chhuak a, Training Centre atan hian Government Hnahthial College hman niin SIRD atangin mithiamte leh tualchhunga Engineer ten an zirtir a, training-na tur sum hi MYC lamin an tum thung tih tarlangin Cement Mistiri training bakah hian Poultry training pawh an lo kalpui tawh tih a tarlang bawk.

Training kharna inkhawmah hian Core team member Pu Vanlalhnema, Zirtirna petu Er.Lalthlansanga, SIRD &PR te chuan thu an sawi bakah trainee-te aiawhin thu an sawi bawk a ni. Training chhung hian ti tha ber 'Best trainee' ah F.Lalhmingliana S/o F.Rozika, Darzo chu thlan a ni.