No.7835/2020-2021

Kolasib dated 18th March 2021: Vawiin khan Commandant, 1st IR Battalion Mualvum, Mizoram hmalakna in Zophai Border Outpost-a duty-te hriselna endikna hun neih a ni.

Pu M.S.Dawngkima, MPS, Commandant, 1st IR Bn. chuan ramri hnaih a Police duty-te chu an hna tha taka an thawh theih nan hriselna tha an neih a pawimawh thu a sawi a. Ramri ven hna ngawrh taka kalpui a tul avangin an awmna hmun an chhuahsan a rem lova, chumi avang chuan a hmunah doctor-te nen Police duty-te hriselna endik hna hi buatsaih a nih thu a sawi.

Ramri hnaiha Police duty-te hi Covid19 hri piah lamah taksa harsatna an neih leh neih loh te, 1st IR Bn. Hqrs a Medical Officer Dr. Zairemmawii leh thawktu dangten uluk takin an endik a, Zophai IR camp-a awmte bakah Bairabi lui hnaih a duty-te pawh a hmunah kalin an endik a, an mamawh ang damdawite an pe nghal bawk a ni.

Vawiin Zophaia Police duty-te hriselna endikna hunah hian duty-te zingah Covid19 vei rinhlelhawm an awm lova, taksa lama harsata lian tham nei an awm lo bawk a ni. Pu M.S.Dawngkima, MPS, Commandant, 1st IR Bn., Pu Gaston Vanlalhriatpuia, MCS, Pu H.Lallunghnema, MPS, Asst. Commandant leh Pu Hmingthanzauala, DIPRO, Kolasib ten vawiina Medical check-up neihna hi an telpui a ni.