No.7631/2020-2021

Hnahthiala mipui phur lirthei Transport Vehicles neitute leh khalhtute pualin vawiin khan RD Conference Hall, Bazar veng-ah Traffic rules chungchang inhrilh hriatna leh inzirtirna neih niin Hnahthial SP Pu Lalbiakkila chuan khuallian niin a hmanpui a, "Dan leh hrai hriat hi mitin mawhphurhna a ni a, chu chuan himna leh huaisenna min pe a ni" a ti

Khuallian Pu Lalbiakkila, SP Hnahthial chuan lirthei chetsualna chu mihring nunna suattu a nih thu leh Driver-te chu an fimkhur a ngaih thu sawiin "Tlan chak lutuk, Rui chunga lirthei khalh, Mahni site loha tlan leh Motor khalh laia mobile phone hman thin chu chetsualna thlen tam tirtu a nih avangin chutiang lakah chuan infihlim a ngai hle a ni" tiin Lirthei chetsual thlen tamna hmun pawh T Junction, Y Junction leh Horn pek that tawk loh vang a nih fo thu sawiin driver-te chu chutiang hun leh hmunah chuan fimkhurna vawng nung reng turin a chah a. Police record danin Mizoramah nikum 2020 khan road  accident vawi 62 thlengin mi 48 an thi a, hliampui tuar 56 an awm tih a tarlang bawk a ni

Hnahthial khawpui thang mekah mihring leh lirthei pawh an pun chhoh zel avangin traffic rules hriat a pawimawh thu sawiin Hnahthial SP Pu Lalbiakkila chuan "Dan bawhchia te chawi tir leh hrem hi kan chak lova chawilo leh hrem in nih loh nan dan in hriat leh zawm a pawimawh a, chumi avanga vawiin hun pawh hi buatsaih kan ni" tiin Hnahthial traffic Police pawh thuam thata khauh leh zual zawka traffic rules kenkawh a nih dawn thu a sawi a, "intan theihtawp kan chhuah dawn a, inhnen atangin thil tha kan beisei ve bawk" tiin thurawn dawngsawng turin an inhawng reng tih a sawi nghal a ni. 

He hun hi Pu Vanlalbiaka Joute , SDPO chuan kaihruaiin Rules of the road regulation leh MV Act chungchang kalkhawmte zirtir nghal a, Pu Rongurlian, JE PWD chuan  'Maintenance of Road regulation' chungchang sawiin ASI Lalrinzuala Sailo i/c Traffic chuan Driving etiquette and manner tih thupui hmangin kalkhawmte a zirtir bawk a ni.