No.7632/2020-2021

Champhai District Consultative Committee (DCC)/ District Level Review Committee (DLRC) chu vawiin khan Pu R.Lalnghakliana, Addl. DC Champhai hovin DC Conference Hall-ah an thukhawm. He hunah hian December 2020 Quarter tawp thlenga Champhai District RD Block 2 huamchhunga Bank leh Stakeholder hrang hrangte hmalakna thlirho niin, RBI aiawhin Pu K.Samuel Liangousiam, Lead District Officer chuan a telpui a ni.

Pu L.Lawmvela, Lead District Manager (LDM), SBI Lead Bank Office Champhai chuan kalkhawmte lawmna thu a sawi hnuah kum kalta December 2020 Quarter tawp thlenga Champhai District chhunga Bank hrang hrangte hnathawh leh hmalaknate thlirletna neih a nih bakah hmachhawpte sawiho nghal a ni. 

Meeting-a tarlan a nih danin December 2020 Quarter zawh thlenga Champhai District-a Bank hrang hranga pawisa dahluh leh pekchhuah khaikhinna Credit Deposit (CD) Ratio chawhrual chu 44.62 % a ni a, September  Quarter tawpa  CD Ratio  44.71 %  aiin 0.09 % in a tlema,  hei hian CD Ratio bituk zat  60 % chu a phak lo a ni. 2020-2021 Financial Year chhunga Annual Credit Plan (ACP) hnuaia hnathawhte thlirho ni bawkin, Priority Sector atana target cheng nuai  7279.28  atangin cheng  nuai  8915.45 (122.48 %)  hu tihhlawhtlin a ni a,  Non Priority Sector hnuaia target cheng nuai 1230 atangin cheng nuai 1018.33 (147.02%) hu tihhlawhtlin a ni. Pradhan Mantri Mudra Yojana (PMMY) hnuaiah mi  282 (Sishu-94, Kishore-168, Tarun-17, Stand Up India-3) te hnenah loan cheng nuai 345.65 hu pekchhuah a ni a. Government Sponsored Schemes hnuaia hmalaknate thlirho a ni bawk a. PMEGP hnuaia target 111 atanga 22 (cheng nuai 50.68), DAY-NULM/MzSRLM hnuaia target 470 atanga 218 (cheng nuai 488.04) te,  DAY-NULM hnuaia target 85 atanga 34 (cheng nuai 50.70 ) leh PMAY/HFA hnuaia target 150 atanga 15 (cheng nuai 39) te tihhlawhtlin a ni. 

PM Kisan Beneficiaries 148 te hnenah KCC Loan cheng nuai 75.65 leh Animal Husbandry hnuaiah mi 153 te hnenah KCC Loan cheng  nuai 185.73  pek a ni a. Priority Sector hnuaia Segment hrang hranga Non Performing Asset (NPA) tlingkhawm zat chu cheng nuai 1698.17, 5.15% niin, Non Priority Sector hnuaia NPA tlingkhawm zat chu cheng nuai 22.35, 0.54% a ni. Loan rulh that loh Bakijai Case 42,  cheng nuai 21.61 hu vel a awma, December  Quarter chhung hian rulh a awm lo a.  Thingtlang/Zokhaw mite tana Bank hman dan zirtirna Financial Literacy Campaign tum 6 buatsaih niin mi 384 an tel a ni. 

Heng bakah hian Currency remittance leh Bank leh ATM venhim  chungchang sawiho a nih bakah pawisa lakchhuah theiha a awm reng theihna tura tanlakna turte sawiho a ni a. Bank tinte pawh chak zawka hma la a, quarter tawp ni atanga chhiara ni 15 chhunga data thehlut thin tura hriattir nawn leh an ni bawk. 

Tun dinhmunah hian Champhai District-ah Bank branch hrang hrang 17 awm mekin, Public Sector Bank  5, Private Sector Bank 5,  Regional Rural Bank  6  leh State Cooperative Bank 1 te an awm mek a.  ATM  9,  Business Correspondent  8, CSP 1 leh IPPB hnuaia Banking Touch Point 26 te an awm mek a. Financial Literacy Centre 2 (Lead Bank Office, SBI Sponsored leh  Champhai Financial Literacy Centre, MCAB Ltd.) te awm mek bawkin kumin kum tawp hian Financial Literacy Centre 5 dang hawn belh tum a ni bawk.