700/2026-2027

Dated Hnahthial, the 26^th May, 2026: UD&PA hmalakna hnuaia Cleanliness Drive chu Hnahthial District-ah kalpui chhunzawm zel niin tukin khan District Urban Development Officer (DUDO), Pi Christina Lalnunfeli kaihhruaiin Khelo India Centre (KIC) naupangte leh HDFA hruaitute chuan HDFA Turf Ground leh a chhehvel tihfai hnatlang an nei. 

DUDO chuan faina leh hriselna chu thil kalkawp leh inthlunzawm tlat a nih avangin kan taksa insawizawina hmunte chu fai taka vawng thin turin naupangte chu a chah a. HDFA turf ground hmang thin zawng zawngte pawh an hnawmhnawkte hnutchhiah mai mai lo tur a ngenin HDFA hruaitute chu he field hmang ngun ber an nihna angin a tihfai kawngah tan lo la lehzual turin a hrilh a ni. 

DUDO hmalaknain Hnahthial District hmun hrang hrang tihfai leh chei that hnatlang chu kalpui mek a ni a. Hnahthial chu District fai leh mawi ber a nih theih nan DUDO chuan theihtawp an chhuah zel tur thu sawiin Hnahthial mipui zawng zawngte chu thawhpuiah a sawm nghal a ni.