699/2026-2027

Kolasib, 25th May, 2026: Vawiin khan DC Conference Hall, Kolasib-ah Kolasib District Consultative Committee (DCC) te chu an thukhawm a, Kolasib District chhunga bank hrang hrangte hnathawh dan leh hmabak awmte an thlirho. He thutkhawm hi Kolasib Deputy Commissioner leh DCC Chairman ni bawk, Pu H. Dolianbuaia'n a kaihruai a ni.

Thutkhawm kaihruaitu DC Pu H. Dolianbuaia chuan thu sawiin, mipuite leh khawtlang hmasawnna atan bank te chu innghahna pawimawh tak an nih thu a tarlang a. Mipuiten sawrkar scheme hrang hrang an chhawr tangkai theih nan leh eizawnna kawnga hma an sawn theih nan bank ten mawhphurhna lian tak an neih thu a sawi. DC chuan, "Mipui harsatnate hriatthiam puia, dawhthei tak leh tha taka lo dawngsawng thin turin bank hnathawkte ka ngen a che u," tiin, department atanga scheme thehluhte pawh a hun taka lo tifel a, a theih chin chinah mipuite tana awlsam zawka thil kalpui thin a tul thu a sawi bawk.

He hunah hian Pu Thuamzamung Tunglut, Lead District Manager (LDM) chuan kum 2025-26 chhunga Kolasib District-a bank branch hrang hrangte hmalakna leh an dinhmun tlangpui report a pe a. Report-a a lan danin, March 2026 thlenga Kolasib District chhunga bank hrang hrangte Credit-Deposit (CD) Ratio khaikhawm chu 63.36% a ni a, hei hi kum hmasa dinhmun aiin 0.31% in a sang zawk a ni.

Meeting-ah hian District Credit Plan kalpui mek dan te, mipuite tana hmalakna hrang hrang leh Central Scheme kalpui dan te chipchiar taka sawiho a ni a. Heng hmalakna kawnga ti tha tawk lo bank awmte chu an tlin lohna chhan leh harsatnate zawh fiah nghal an ni. Hei bakah hian kum 2026-27 atana District Annual Credit Plan kalpui turte pawh thlirho nghal a ni bawk.

Vawiin thutkhawmah hian Reserve Bank of India (RBI) atangin Pu Harish Vedi, Lead District Officer (LDO) a telpui a. Kolasib District chhunga bank branch hrang hrang hotute, Agriculture, AH & Vety, Horticulture leh Industries department aiawh hotute bakah NABARD hotute an tel a ni.