698/2026-2027  

Aizawl, 25 May 2026 : Fisheries, Animal Husbandry & Dairying leh Panchayati Raj Union Minister Pu Rajiv Ranjan Singh (alias Lalan Singh) chuan vawiin khan Thuampui-a MULCO Dairy a tlawh a, Mizorama cooperative dairy sector tihchakna tur hmalakna hrang hrang a tlangzarh.

He programme-ah hian Union Minister of State for Fisheries, Animal Husbandry & Dairying leh Minority Affairs changtu Pu George Kurian, Union Minister of State for Fisheries, Animal Husbandry & Dairying leh Panchayati Raj changtu Prof S.P Singh Baghel,Mizoram sawrkar hnuaia Animal Husbandry Veterinary Minister Pu C.Lasawivunga, Cooperation Minister Pu P.C. Vanlalruata, Fisheries Department changtu Minister Pu Lalthansanga te bakah sorkar mi pawimawhte, National Dairy Development Board (NDDB) aiawhte,  Mizoram Milk Producer’s Cooperative Union Limited (MULCO), State sawrkar AH&Vety, Fisheries leh Cooperation Department hotute, cooperative society member-te leh farmer-te an tel a ni.

MULCO Dairy hmunah hian Union Minister leh amah tawiawmtute chu Mizoram Milk Union Manager leh official-ten an lo dawngsawng a, Mizo Café leh FPO Office-cum-Sale Outlet hawnna hun tawi hman nghal a ni.

Hemi zawh hian Union Minister chuan MULCO Dairy Processing Plant a tlawh zui nghal a; National Dairy Development Board (NDDB) official-ten milk processing plant 20 TLPD tihchangtlun leh tihchak dan tur sawipuiin, an mamawhte an thlen a ni.

Minister Pu Rajiv Ranjan Singh chuan thusawiin Mizoram Milk Producers' Co-operative Union Ltd (MULCO) hmasawnna hmel hmuh tur awm mek chungchangah lawmthu a sawi a. Dairy cooperative-te leh thawktute hmalakna avanga MULCO-in hma a sawn hret hret chu lawmawm a tih thu tarlangin, he hmasawnna hi chhunzawm zel a nih theih nan Union leh State Sorkar te chu thawk hovin hma an lak chhunzawm zel tur thu a tiam a ni.

Minister chuan Mizoram chhunga bawnghnute thar chhuah (milk production) dinhmun chu a la tlem hle tih a tarlang a. Hei hian kan mamawh min la phuhruk tawk lo a ni tih a sawi. Kan chhehvel state-te lakah kan hnufual bik tur a ni lo, tiin, NE state dangte kan umphak a, kan pelh theih nan ranvulhtu leh official-te chu tan la thar zel turin a ngen a ni.

Minister chuan hmalakna tur hrang hrang sawiin, ranvulhtute leh state sawrkar tana chanchin lawmawm tak chu, Central Sawrkar-in sum (matching share) a thawh dan a thlak danglam hi a ni a,75:25 ni thin chu tunah chuan 90:10-ah thlak a ni tawh dawn a ni. Hei hian state sawrkar sum thawh tur nasa taka a tihhniam avangin hmasawnna hnathawhte a chak phah hle dawn a ni, a ti.

Milk processing plant-te leh village-level procurement system-te tihchangtlun zel a ni anga, NDDB nen thawk hovin bawng chi tha (Artificial Insemination) leh ran chaw (fodder) tha farmers-te hnenah awlsam zawka chhawp chhuah a ni ang.MULCO hmangin Mizoram chhunga thar chhuah ngei—paneer, rasmalai, leh bawnghnute hriak (ghee) te chu Aizawl leh a chhehvel bazaar-ah nasa zawka zawrh chhuah a ni ang.

Central Sawrkar chuan North East bial hmasawnna turin thlawpna tha ber pek a inhuam a, amaherawhchu heng hmalakna hlawhtlinna tak tak chu State Sawrkar leh ranvulhtute tan laknaah a innghat a ni, a ti.

Programme neih chhung hian hmalakna thar leh product hrang hrang tlangzarh niin, chung zingah chuan MULCO Cow Ghee bakah khawl chi hrang hrang - baled silage, Type-II cattle feed, dewormer leh mineral mixture product-te pawh tlangzarh an ni.

He programme-ah hian Fisheries kaihhnawih certificate-te pawh sem chhuah a ni a. Fisheries KCC card te, Best Startup in Fisheries award leh Best Fisheries Cooperative recognition-te pawh hlan an ni bawk.

Cooperation Department Commissioner & Secretary Pu Udit Prakash Rai chuan Mizorama cooperative dairy sector tihchakna tur hmalakna leh ruahman hrang hrang a sawifiah a.NDDB Chairman Dr. Meenesh Shah chuan Mizorama dairy cooperative tihchak leh milk processing infrastructure tihhmasawn a pawimawhzia a sawi bakah MULCO hnuaia farmer te leh fish farmer ten sawrkar laipui hmalakna atanga hmasawnna an hmuh te leh an hnathawh dan sawina hun an hmang bawk.

Animal Husbandry & Veterinary Department Secretary leh MULCO Chairman Pu Lalsangliana’n lawmthu sawiin hun a khar a ni.