No.3158/2021-2022
Aizawl the 25th November, 2021 : Hnahthial District chhunga Police hotute chuan vawiin khan Superintendent of Police Pu Lalbiakkila hovin a Office Chamber-ah Crime review meeting an nei a, kumin 2021 January atanga thla kalta October thleng khan thubuai chi hrang hrang 20 ziah luh tawh niin heng zinga 10 chu la chinfel loh a ni.
Meeting kaihruaitu SP Pu Lalbiakkila chuan Case IO tha ni turin taimakna nen uluk taka thil tih a ngaih thu leh Dan in tih tura a tih leh tih loh te zawm a ngaih thu sawiin Police te chu thawk ho tur an nih angin hmalakna chin inhrilhhriat chak a pawimawh thu a sawi bakah Hnahthial District chhung Police Station leh Outpost te chu an huamchhung khaw tina Raltlan dinhmun record fel fai tak nei theuh tur leh dan leh hrai hrilhhriatna kawngah hmala turin a chah bawk a ni.
Krismas leh kumthar vuakvetah Hnahthial District chu Sorkar thuchhuak ti hlawhtling ber nih tuma hmala turin Police hotu kalkhawmte chu chahin SP Pu Lalbiakkila chuan Sorkar-in a khap thil -Halpuah leh Halmawi, Naupang Silai lem zuar an awm leh awm loh endik fo turin a hrilh a, Internet kaltlanga suahsualna do kawngah pawh "Police te hi misualte hnunga tlan tur kan ni lova, kan tlan khalh zar zar a ngaiin kan inzir thar zel a tul a ni" tiin Hnahthial District Police te chu District dangte entawn tlak ni tura thawhhona tha vawng nung tlat turin a chah bawk a ni.
He huna tarlan danin January - October 2021 chhungin Hnahthial District-ah thubuai 20 ziahluh niin he hun chhung vek nikum 2020 aiin 5 in a tlem zawk a ni. Nikum-ah POCSO 2 a awm laiin kumin hian a awm lova, nikumah Tualthahna 1 a awm laiin kuminah a awm lo bawk. ND&PS Act hnuaiah nikum khan thubuai 7 ziah luh a nih laiin kumin 2 ziah luh a ni a, MLP Act hnuaiah pawh nikum khan 5 ziahluh a nih laiin kumin 3 ziahluh a ni bawk. Hetihlai hian nikum khan Hnahthial District-ah hian inrawkna 3 ziahluh a nih laiin kuminah erawh 6 ziahluh a ni a, rukruk thubuai pawh nikumah 1 ziahluh a nih laiin kumin hian 5 ziahluh a ni tawh bawk a ni. Unnatural death hi nikum leh kuminah 7 ve ve an awm tawh bawk.
Hnahthial Traffic Police ten Kumin January atanga vawiin thlenga Lirthei dan bawhchhia an man atang Pawisa an hmuh chu Rs.86,650 niin kumin kum kal mekah Thla kalta October 2021 thlenga Covid-19 inkaihhruaina dan bawhchhia te pawisa chawi tlingkhawm pawh Rs.82,900 a ni.
Attachment
- Loading attachment...
