No.3157/2021-2022

Aizawl, 25th November, 2021: District Education Office, Champhai building thar chu vawiin chawhnu dar 2 khan School Education Minister Pu Lalchhandama Ralte chuan khuallian niin a hawng. He hunah hian Health & Family Welfare Board Vice Chairman leh Champhai North bialtu MLA ni bawk Dr. Z.R Thiamsanga chu khualzahawm a ni a, Veterinary, Fishery & Sericulture Board Vice Chairman Pu C.Lalmuanpuia, MLA pawhin Minister tawiawmin he hun hi a telpui a ni.

Khuallian Education Minister Pu Lalchhandama Ralte chuan mi hmasate hmalakna avangin Champhaiin zirna hmunhma tha tak tak a neih thu leh khawpui thang mekah duh anga invalhna tur  Education Department-in a nei chu lawmawm a tih thu a sawi a. Office mamawh an thlente chu remchang hmasa veleh pek a nih tur thu sawiin, zirna ngaipawimawh leh Education Department thawhpui tha berte zinga mi Bawrhsap an nei chu a lawmpui thu a sawi a. Hripui leng avanga harsatna a awm hnuah zirna in te hawn leh tan a ni a, kalphung pangngai anga kal leh thuai tum a nih thu a sawi bawk.

DEO Office building thar hawn chuan inpekna thar, zirna kawnga thawktute leh tihhmasawn duhtute inkarah inthlunzawmna thar kengtel se a duh thu sawiin, dawrtute tana dawr nuam leh zirna kawnga Champhai District thanharhna thlentu ni se a duh thu a sawi a. Zirna lama lo hmingtha tawh thin leh tunhma zirna in runpui Champhaiin tun hma rual u zawkte hunlai pha tawh lova hun rei tak a awm chu veiawm a ti a, zirna kawnga Office lian ber building thar hawn chuan chona thar zirtirtu chang nilo, official leh khawtlang pum huapin a thlen ngei a beisei thu a sawi a. Hmasawnna zawng zawng bulthut chu zirna a ni a,  zirna ngaipawimawh leh thinlunga hmunsang chantirtute an dingchhuak thin a ni, a ti bawk.

Zirna in leh a velte chu neitu thinlung pu chunga venghim tur leh nek ral tur laka humhim a tul thu sawiin, a thawktute nen inzahtawnna nen innek zawng nilova insiamrem thiam a tul thu a sawi a. Ram thanna tur hnukpui chu zirna a ni tih sawrkarin a hriat avangin chawisan kawngah theihtawp a chhuah thu a sawi a. Hrileng vanga harsatna karah indaihlohna phuhruk nan thawktu 2000 chuang lak a nih thu tarlangin,  SEDP, CSS leh Samagra Shikha te atangin theihtawp chhuah a ni chunga indaihlohna awm chu Chief Minister remruatnain hmalak a ni a, mamawh zual phuhru turin grant-in-aid  kaltlangin tual chhung mi chhawr tur SEDP sum cheng vaibelchhe 3 hmangin ruahmanna chak taka kalpui a ni, a ti a. Zirna  tihchangtlung nan Department mai bakah line department dangte nen thawkdunin tanho a nih thu pawh a sawi bawk.

Zirtirtu lak reng rengah a thiam thiam la tura tih thin a nih thu sawiin, naupangte tuihalna leh hmasawn duhna chawmzo thei turin zirtirtute tuaihriam kawngah training chhawpchhuah zel tum a ni a ti a. Zirtirtute chu khawtlanga mi zahkai an nih thin thu sawiin,  zirtirtu nih dan tur anga nunglo leh zahkai lote chu intuaithara insiamtha turin a sawm a. Zirtirtute chu ram leh hnam hmangaihna nunpuia an hna vawn zahawm tak leh mawhphurhnate  hlenchhuak tura intuaihriam a, hmasawn duhna rilru nei turin a chah bawk a. Zirlai naupangte chu nawmsakna leh hlimhlawp thilte kalbosan ngam a, hlawhtlinna tak tak chang tura ka ti thei a ni tih tumruhna rilru nei turin a chah bawk.

Quality Education nei tura hmalak mek zel a nih thu sawiin, Syllabus te a tul angin NCERT standard milin her rema kalpui thin a nih thu a sawi a. Quality Education a awm theih nan zirtirtu, zirlai, District administration, khawtlang hruaitute leh NGO te thawhho a ngaih thu sawiin, sikul hrang hrangte chu assessment siama, tihturte leh tehfung dangte bituk siama grade pek tum a nih thu leh chumi zulzuia fund pek tha tih a nih thu a sawi a. Hmuhphakah zirna in tha, tu leh fate kalna tur tha tak a awm theih nan ngaihtuahna sen mek a ni, a ti a. Zirnain bul a tan that leh theihna tur chuan rawngbawlna thinlungpua zirna kalpui a ngaih thu sawiin, neitu nihna thinlung leh thawhhona tha tak hnuaiah kan zavaia tanho a tul a ni tiin, zirna tihhmasawn kawnga thawhhopuiah thawktute leh mipuite a sawm a ni.

Khualzahawm H&FW Board Vice Chairman Dr. Z.R Thiamsanga chuan Champhaia DEO office mawi leh tha tak hawn a ni ta chu Champhai District tan ni chhinchhiah tlak tak a nih thu sawiin, Champhai District tana rohlu tak siam a nih kawnga tha thawhtute leh a puitlin theih nana tha taka satute chu fakawm a ti a. Champhai chu tunhma atanga zirna leh kawng danga mithiam leh hmingthate chherchhuaktu a nih thu tarlangin, zirna tihhmasawn kawnga pawimawh tak DEO Pisa thar hawn a ni chuan zirna kawnga bultanna thar Champhai District-ah thlen ngei se a duh thu a sawi a. Zirna chu hna hmuhna atan mai nilo, hmasawnna kawng hrang hrang nei thei tura rahbi pawimawh tak a nih thu a sawi a. Zirtirtute chu khawi hmunah pawh dah se phunnawi mai lova an hna leh tihturte tha taka hlenchhuah tum zel turin a chah bawk a ni.

Covid-19 hrileng vangin khawvel pum ram changkang zawkte thlenga an buai thu leh harsatna an tawh thu sawiin, Mizoram ngei pawh kan buai em em a, thawhhona leh inlungrualna duhawm tak hnuaiah tanlak a ni a, a ti a. Hun khirh tak tawh mek karah tumah indem mai lova infinchhuah zawk fo a tul thu a sawi a. Sawrkarin sum leh pai harsatna karah a theih ang anga hmasawnna ruhrel siam kawngah tan a lak chhunzawm reng thu sawiin, mipui mamawh nitin khawsak kawnga tul leh mamawhte chhawpchhuah kawngah theihtawp chhuah zel a ni, a ti bawk.

Thusawitu dang Pu C.Lalmuanpuia, MLA & Vice Chairman, Veterinary, Fishery & Sericulture Board chuan hripui leng kara online class kalpui kawnga thawktute inpekna chu fakawm a ti a. Hun harsa karah Education department tihchangtlung leh thuamchak kawngah theihtawp sawrkarin a chhuah thu sawiin, ram hmasawnna kawnga pawimawh tak zirna tihhmasawn nan theihtawp chhuaha tanrual a tul thu a sawi bawk.

District Education Office, Champhai building hi October ni 1, 2018 khan sak tan a ni a. Mizopa chhiara chhawng nga niin, a hnuai ber atanga chhiarin Store room, Garage, Samagra Shiksha Office, DEO office leh a chung berah Training Hall a awm a. A building lenzawng hi a dung feet 76.4 niin, a vang hi feet 41.2 a ni thung a. Office building bakah hian tualzawl white topping siam a ni bawk.

He building hi Lushai Engineers hnuaia sak niin, a satu atan Pu C. Lalhmunliana leh Pu HS Vanlalfakzuala, IB Veng, Champhaite chu thlan an ni a. Building sak nan hian Rs. 2,00,62,925/- (cheng vaibelchhe hnih singruk sanghnih zakua sawmhnih leh panga)  sen a ni a. Heng bakah hian Electric fit nan Rs. 6,33,614/- (cheng nuai ruk singthum sangthum zaruk sawm leh pali), Education Training Hall cheibawl nan Rs. 2,00,000/- (cheng nuai hnih) leh Tualzawl white topping siam nan Rs 3,90,875/- (cheng nuai thum singkua zariat sawmsarih leh panga) sen tel ni bawkin, DEO Building leh a kaihhnawih dangte siam nana sum sen zat hi avaiin Rs. 2,12,87,414/- (cheng vaibelchhe hnih nuai sawmpahnih singriat sangsarih zali sawm leh pali) a ni.

Hawnna hun Education Training Hall-a neih hi District Bawrhsap Pi Maria C.T Zuali, District Education Committee (DEC) Chairman ni bawk chuan kaihhruaiin District chhung zirna dinhmun tlangpui leh zirna tihhmasawn kawnga hmalaknate a tarlang a.  School Education Director Pu James Lalrinchhana'n kalkhawmte lawmna thu a sawi a. Pu T.T Laltanpuia, DEO & DPC (Samagra Shiksha), Champhai hnen tangin report ngaihthlak a ni bawk.

He hunah hian School Education Department hotute, District Official-te leh sawmbikte an tel a ni.