Art & Culture Minister Pu PC Zoram Sangliana chuan Art & Culture Department leh Mizo Zirlai Pawl General Headquarters tangkawp buatsaih Inter College Cultural Dance Competition chu khullian niin a hmanpui.

Pu PC Zoram Sangliana chuan Mizo hnam lam mawi tak Cheraw leh Sarlamkai hmanga College zirlai te inelna buatsaih a ni chu lawmawm a tih thu sawiin hnam changkang apiangin mahni hnam rohlu leh hnam thil vawnhim nachang an hria a ni, a ti. Minister chuan Commonwealth Games, New Delhi-a neih tuma India Team te hmahruaitu nula incheina atana an thlan chhuah, Mizo nula te incheina mawi tak hi India ram leh khawvel pawhin a mawi zia an hriat tawh thu leh tidal lova a nih dan tur ang taka (originality) vawnhim a tul thu a sawi a. Man tlawm zawka a suak siam ching an awm chu pawi a tih thu tarlangin Mizo kan nih angin hnam thil hlu leh rohlu kan neih te hi kan vawnhim a tul a, tu hnam mahin min vawnhim sak dawnlo a ni, a ti bawk. Hnam thil hlui chawisang tur leh vawng him tura kan inzirtir rual hian Mizo thalaiten thliarkar rilru pu lova, hnam dang te thil chin that chhawm luh nachang erawh kan hriat a tul a ni, Minister chuan a ti.

Sarlamkai leh Buhza aih Cheraw hmangin College 10 an inel a. Sarlamkaiah Govt. T. Romana College chu pakhatna niin Cheraw -ah Govt. Aizawl College pakhatna an ni. A pumpuiah Govt. Aizawl College chu pakhatna an ni a, pahnihna chu Govt. Hrangbana College niin pathumna chu Pachhunga University College an ni. Pakhatna hian Rs 10,000 leh Citation an dawng a, pahnihna in Rs 7000 leh Citation, pathumna in Rs 5000 leh Citation an dawng a ni. College dang 7 te hnenah Participation Prize Rs 1000 leh Citation hlan an ni bawk a. Art & Cultural Department chuan he inelna a pakhatna leh pahnihna lawmman la tu College te hi kumin chhungin India ram hmun hrang hranga zinna an buatsaihsak dawn bawk a ni.