Parliamentary Secretary for Sports & Youth Services, etc. Pu Hmingdailova Khiangte chuan “hnamdang mistiri leh mutia ten hnathawh sen loh an hmuh laiin Mizo thalai hnathawh tur nei lova kan awm mai mai reng a nih chuan chimralin kan awm thuai thei. Chuvang chuan thalaiten kan rama hnathawh tur a awm ang angte taima taka kan thawh zel a ngai” tiin a sawi. He thu hi nimin 29.3.2017-a Sakawrhmuituai Group YMA Conference vawi 64-na, Lungdai YMA Hall-a neih chu khuallian nia a hmanpuinaah a sawi.

Pu Hmingdailova Khiangte, bialtu MLA chuan ram leh hnam humhalh a pawimawh zia sawiin, CYMA pawhin kumpuan thupui atan a thlang nawn thin reng a ni, a ti a. Chimral kan nih loh nan a pawimawh ber chu ei leh bara intodelh a nih thu sawiin, chumi atan chuan mi taima, rinawm leh dikna ngaipawimawhtu kan nih theuh a tul a ni, a ti a. Kan ram socio-economic dinhmun chawikang turin leh chimral mai kan nih loh nan YMA nula tlangvalten hma an lak naah tha thlah lo turin kalkhawmte chu a fuih bawk.

Parliamentary secretary chuan YMA Member nula leh tlangvalte chu HIV/AIDS lakah an fihlim nan inveng fimkhur turin a chah tel a. AIDS kai awlsamna tlanglawn ber, mipat-hmeichhiatna hman leh ruihhlo hmansualna laka fihlim turin conference chhimtute chu a chah a ni.

Sakawrhmuituai Group YMA Conference hi ni 28-29 March, 2017 chhhung khan hman a ni a. CYMA President Pu Lalbiakzuala leh YMA Kolasib YMA Sub Hqrs. President Pu C. Liankunga ten thu an sawi bawk.