Zoram Research Foundation (ZoRF) hotute chuan vawiin khan  Mizoram Governor  Lt Gen Nirbhay Sharma, PVSM, UYSM, AVSM, VSM, (Retd) chu Raj Bhawan-ah hmuin Chite Lui humhalh leh a hma anga siamthat leh nana an hmalak tum dante an sawipui.

Mizoram Larsap chuan ZoRF thiltum chu a thlawp zawng tak leh a phurpui zawng tak a nih thu hrilhin tuna Chite Lui dinhmun enin a ngai awh tura siamthat leh chu thil tih theih a la nia a hmuh thu a sawi a. Hemi hlawhtlin nan mipuite zinga hrilhhriat zau a pawimawh hmasa ber a, sorkar, kohhran leh tlawmngai pawlte nena thawhho dan tur dapchhuak turin core committee din turin a hrilh bawk a. Ramchhung hmundanga cheng tam takte chuan khawpui tihbawlhhlawh a, a tihfaina hna chu sorkar tih turah an dah thin a; Mizo mipuite erawh chu faina kawngah hmun dang tam takte aiin an changkang zawk leh hmalak an chak zawka a hriat avangin he Chite Lui humhalh tumna kawngah pawh Mizo mipuite chuan an thlawp ngei a beisei thu a sawi bawk.

ZoRF-in a kalpui tum ‘Chite Lui Restoration Programme’ hi hun engemawchen an rel tawh a, sorkar hotute bakah zirna in leh tlawmngai pawl hrang hrangte pawh an dawr tawh thu Larsap an hrilh a. Chite Lui-ah hian Aizawl khawpui bawlhhlawh, tui bal leh leivung a lut nasa lutuk leh khawpui thang lian zel chuan nasa takin Chite chu a tikam tih an sawi a. Tuna Chite Lui dinhmun dik tak zirchiang turin hmalak mek a nih thu leh mipuite pawh hrilhhriat zau nan media kaltlang leh state pawna environment lam mithiamte nena thawk hovin hmalak an duh thu an sawi bawk.

Vawiin Larsap kawmnaah hian ZoRF aiawhin Team Leader leh Executive Member Er. Dunglena, IES (Rtd); Sr. Vice Chairman Pu Rin Sanga, IAS (Rtd); Gen. Secy. Pu Rochamliana, Treasurer Pi Mina Zoliani leh Executive Member Dr. John Zothanzama te an tel a ni.