Vawiin India Hnampa Mahatma Gandhi pianchamphaphak vawi 146-na ah, amah zahna entirin tukin khan Governor Lt Gen (Rtd) Nirbhay Sharma, Chief Minister Pu Lal Thanhawla, Speaker Pu Hiphei, Council of Ministers, Parliamentary Secretary leh Official hotu lian ten Zodin Canteen kual bula a limah pangpar an dah a. Pu Gandhi piancham denchhen hian UD&PA Department hmalaknain Faina Hapta hman tan nghal a ni.

Faina Hapta bul tanna ah hian Governor chuan swatchh bharat leh Gandhi inlaichinna hi South Africa a awm lai atang daih tawha faina hi alo kalpui tawh a ni a ti a. India hi ram fai ni tura nasa taka hmalatu, miten zawm tura a tih zirtirna a pek thin te amah ngeiina a taka zawma kalpuitu a ni a ti. Swatchh Bharat Abhiyan hi mipui zawng zawng huapa kalpui tur a ni tiin, Mizoram chuan faina mai nilo hmasawnna dang dangah pakhatna ni turin hma kan la thei a ni a ti. Mahni tih theih reng hi midangte tih tura dah tur a nilo tiin, Governor chuan Mizoram hi sarang awm lohna hmunah i siam ang u tiin mipuite a sawm a ni.

Chief Minister pawhin thusawiin, Prime Minister Pu Narendra Modi’n faina beihpui ‘Swatchh Bharat Abhiyan’ a thlak hma daih kum 1997 atangin Mizoramin Faina Hapta kan lo kalpui tawh thin a ni a ti a. Swatchh Bharat Mission hi Mahatma Gandhi kum 150 a tlinna tur kum, kum 2019 khian India rampum hi ram faia chhal theih tura hmalak mek a ni a ti a. Faina kan tih hian khawlai leh kan pawnlam lan dan mai bakah kan chhungril nun pawh a fai a pawimawh a ni a ti a. India ram hmun danga an chin thin khawlaia inthiar (open defecation) hi Mizoramah chuan a awmloa ngaih a ni tiin, Chief Minister chuan hmun thenkhatah chuan local body (panchayat), VC kan tih mai chuh thei turin ekin fumfe tak a neih ngei ngei a tul a, hei pawh hi Mizoramah chuan a tul ve lo a a hriat thu a sawi a. India ram khawpui fai 476 thlan chhuah zingah Aizawl chu 35-na kan nih thu a sawilang bawk a. Theihtawpa hma kan lak chuan pakhatna kan hauh thei a ni a ti.

Swatchh Bharat Abhiyan hi khawpuiah UD&PA department in an kalpui a, thingtlang lamah chuan PHE department in an kalpui thung a ni.